मंगलबार सेयर बजार झिनो अंकले बढेको छ। नेप्से ०.९४ अंकले बढेर २६३० अंकमा कायम भएको छ। आज १३६ कम्पनीको मूल्य बढ्यो भने १३५ कम्पनीको मूल्य घट्यो। आठ कम्पनीको मूल्य स्थिर रह्यो।
कारोबार रकम भने उल्लेख्य बढेको छ। हिजो ४ अर्ब रुपैयाँको कारोबार भएकोमा आज ५ अर्ब ८० करोड रुपैयाँको कारोबार भयो। आज जलविद्युत् क्षेत्रमा आकर्षण देखिएको छ। सो समूहगत सूचक सबैभन्दा धेरै १.६५ प्रतिशत अर्थात् ५९ अंक बढ्यो। अघिल्लो दिन उत्पादन तथा प्रशोधन क्षेत्रमा आकर्षण देखिएको थियो।
अन्य समूहमा माइक्रोफाइनान्स ०.०१ र अन्य समूह ०.०६ प्रतिशत बढे। बैंकिङ ०.३७, विकास बैंक ०.४५, फाइनान्स ०.१८, होटल तथा पर्यटन ०.५१, लगानी ०.२३, जीवन बीमा ०.५९, उत्पादन तथा प्रशोधन ०.५०, निर्जीवन बीमा ०.०६ र व्यापार समूह ०.२६ प्रतिशत घटे।
हालै सूचीकृत बेनी हाइड्रोपावरको मूल्य सबैभन्दा धेरै १५ प्रतिशत बढ्यो। माथिल्लो मैलुङखोला जलविद्युतको १२.०९, दोर्दीखोलाको ६.७९, सुपरमाइ हाइड्रोपावरको ५.९५, सिर्जनशील लघुवित्तको ५.६८, पिपुल्स हाइड्रोपावरको ४.८९ र शिखर पावरको ४.६३ प्रतिशत मूल्य बढ्यो।
युनिलिभरको मूल्य सबैभन्दा धेरै ४.९१ प्रतिशत घट्यो। आज मूल्य धेरै घट्ने कम्पनीमा डिबेन्चरहरू अगाडि देखिए। धेरै कारोबार भएका कम्पनीमा घलेम्दी हाइड्रोपावर, पिपुल्स हाइड्रोपावर, सानिमा मिडिल तमोर, लिबर्टी इनर्जी, ग्रिन भेन्चर्स, हिमालयन डिस्टिलरी र अपी पावर अगाडि रहे।
