नेपाली कांग्रेसका नेता एनपी साउदले अदालतले १४औं महाधिवेशनलाई मान्यता दिए मात्रै पार्टी एक ठाउँमा रहन सक्ने, नत्र आ–आफ्नो बाटो लाग्नुपर्ने अवस्था आउन सक्ने बताएका छन्। अदालतको निर्णय नआएसम्म त्यसबारे अन्तिम रूपमा केही भन्न नसकिने उनको भनाइ छ।
कांग्रेस अहिले गगन थापा, शेरबहादुर देउवा र डा. शेखर कोइराला–पूर्णबहादुर खड्का गरी तीन धारमा विभाजित छ। गगन थापा पक्षले आफ्नो महाधिवेशन गरिसकेर थापालाई सभापतिमा चुनेको छ भने देउवा पक्षले मंसिरमा महाधिवेशन गर्ने तयारी गरिरहेको छ। शेखर कोइराला पक्ष भने अन्योलमा देखिएको साउदको भनाइ छ।
पूर्वपरराष्ट्रमन्त्री साउद सुरुदेखि नै देउवाका साझेदार मानिन्छन्। उनले वडा अधिवेशन धेरै ठाउँमा सम्पन्न भएको, पालिका अधिवेशन केही ठाउँमा मात्र बाँकी रहेको र प्रदेशसभा तथा क्षेत्रीय अधिवेशन पनि अधिकांश ठाउँमा भइसकेको बताए। जिल्ला अधिवेशनका लागि कात्तिक १५ गतेसम्मको समय तोकिएको भए पनि केही जिल्लामा त्योभन्दा अगाडि नै अधिवेशन सम्पन्न हुने अवस्था रहेको उनको भनाइ छ।
विधानबमोजिम एक निर्वाचन क्षेत्रबाट ३५ जनाका दरले ७ हजार ४ सय २५ महाधिवेशन प्रतिनिधि छानिनेछन्। १४औं महाधिवेशनका सबै सहभागीलाई मंसिर २१–२३ को महाधिवेशनमा आउन अनुरोध गरिरहेको उनले बताए। आफूहरूले त्यसलाई एकताको महाधिवेशन बनाउन चाहेको भए पनि गगन थापा पक्ष तत्काल आउने सम्भावना नदेखिएको उनको भनाइ छ।
साउदले पार्टीको आधिकारिकतासम्बन्धी मुद्दा अदालतमा विचाराधीन रहेकाले आफूहरू अदालतको निर्णय पर्खिरहेको बताए। उनले अदालतको निर्णयपछि सबै कुरा मिल्ने र त्यसपछि राजनीतिक प्रक्रियाबाट एकताको सम्भावना बाँकी रहने बताए। नेतृत्वबारे उनले सकेसम्म सहमतिको महाधिवेशन बनाउने प्रयत्न रहने, नत्र लोकतान्त्रिक प्रक्रिया अपनाइने बताए। शीर्ष नेताहरूलाई सम्मानजनक स्थान दिने विषयमा आफूहरू सकारात्मक रहेको र नेतृत्व अब दोस्रो पुस्ताले गर्ने उनको भनाइ छ। देउवा पुनः नेतृत्वमा आउने सम्भावना नरहेको साउदले बताए।
