ललितपुरको जावलाखेल खेल मैदानमा कात्तिक १२ देखि १६ गतेसम्म पाँच दिने गोदावरी फुल प्रदर्शनी आयोजना हुने भएको छ। फ्लोरिकल्चर एशोसिएसन नेपाल (फ्यान) ले आयोजना गर्न लागेको १९औँ संस्करणको प्रदर्शनीबारे मंगलबार पत्रकार सम्मेलनमार्फत जानकारी दिइएको हो।
‘रोपेर फुल गोदावरी, सजाऔं घर आँगन वरिपरि’ भन्ने नारासहित हुने मेलाको उद्घाटन कात्तिक १२ गते बिहीबार बिहान ११ बजे बागमती प्रदेशका वन तथा वातावरण मन्त्री रमा आले मगरले गर्ने कार्यक्रम छ। प्रदर्शनीमा व्यावसायिक स्टल ७८, प्लान्ट क्लिनिक स्टल एक, आधिकारिक स्टल चार, प्रतियोगितात्मक स्टल दुई र फोटो सेल्फी स्टल एक गरी जम्मा ८६ स्टल रहनेछन्।
मेलामा ४५० भन्दा बढी प्रजातिका गोदावरीका बिरुवासँगै सयपत्री, मखमली र अन्य आलङ्कारिक बोटबिरुवा प्रदर्शन तथा बिक्री गरिनेछ। मिनिएचर, स्पाइडर, रिफ्लेक्स, इन्कर्भ र कट फ्लावर गरी पाँच प्रजातिबीच प्रतिस्पर्धा हुनेछ र उत्कृष्ट नर्सरी वा फर्मलाई नगद, शिल्ड र प्रमाणपत्र दिइनेछ। फुलबिरुवामा लाग्ने रोगकिराबारे बालिरोग विशेषज्ञसहितको प्लान्ट क्लिनिकबाट निःशुल्क परामर्श पनि दिइनेछ। आयोजकले ३९ हजारभन्दा बढी अवलोकनकर्ता र एक करोड ३० लाख रुपैयाँभन्दा बढी कारोबार हुने अपेक्षा गरेको छ।
फ्यानले पुष्प व्यवसायको अवस्था पनि सार्वजनिक गरेको छ। हाल ५४ जिल्लामा करिब ३२५ हेक्टरमा पुष्प खेती भइरहेको छ भने क्षेत्रमा ११ अर्ब ५० करोड रुपैयाँभन्दा बढी लगानी र ६२ हजार ५०० भन्दा बढी जनशक्तिले रोजगारी पाएका छन्। चालु आर्थिक वर्षमा १६.९१ प्रतिशतले वृद्धि भई समग्र वार्षिक कारोबार करिब तीन अर्ब ९४ करोड रुपैयाँ पुग्ने अनुमान छ। भन्सार विभागको तथ्याङ्कअनुसार आर्थिक वर्ष २०८०/८१ मा पुष्प तथा पुष्पजन्य वस्तुको आयात १०५.६६ प्रतिशतले बढेर २६ करोड १३ लाख रुपैयाँ पुगेको छ भने निर्यात ४५.७१ प्रतिशतले घटेर एक करोड १५ लाख रुपैयाँमा सीमित भएको छ।
