नेपाल प्रिमियर लिगको तेस्रो संस्करणमा प्रत्येक खेलका उत्कृष्ट खेलाडीलाई चाँदीको बल दिने नयाँ व्यवस्था सुरु भएको छ। एक्स्ट्रिम इनर्जी ड्रिङ्कले ‘एक्स्ट्रिम म्यान अफ द म्याच’ कार्यक्रममार्फत यो सम्मान दिन लागेको हो।
प्रतियोगिताको पहिलो खेलमै सुदूरपश्चिम रोयल्सका शेर मल्ल यो सम्मान पाउने पहिलो खेलाडी बनेका छन्। उनको प्रदर्शनका आधारमा उनलाई चाँदीको बल प्रदान गरिएको हो।
यो पुरस्कारका लागि प्रतियोगितामा सहभागी आठ टोलीमध्ये एक्स्ट्रिमसँग प्रायोजन साझेदारीमा रहेका सात टोलीका खेलाडी योग्य हुनेछन्। एक्स्ट्रिम प्रायोजित दुई टोलीबीच खेल हुँदा दुवै टोलीका उत्कृष्ट खेलाडीले चाँदीको बल पाउनेछन्।
आयोजकका अनुसार रन र विकेटको प्रतिस्पर्धासँगै खेलाडीको राम्रो प्रदर्शनलाई थप प्रोत्साहन दिन यो पुरस्कार ल्याइएको हो। चाँदीको बल हरेक खेलपछि छानिने उत्कृष्ट खेलाडीलाई दिइनेछ, जसले प्रतियोगिताभरि खेलाडीबीच स्वस्थ प्रतिस्पर्धा बढाउन सक्नेछ। जारी संस्करणमा आगामी खेलहरूमा कुन खेलाडीले यो सम्मान पाउँछन् भन्ने चासो पनि बढेको छ।
