नेपाली कांग्रेसका सभापति गगनकुमार थापाले पार्टीलाई एकढिक्का बनाउन विशेष संवाद अभियान सञ्चालन गर्नुपर्ने बताएका छन्। मंगलबार पोखरामा बीपी स्मृति पुस्तकालय गण्डकी प्रदेशले आयोजना गरेको सम्मान कार्यक्रममा उनले आन्तरिक प्रतिस्पर्धाका क्रममा उत्पन्न भएको तिक्तता त्याग्नुपर्नेमा जोड दिए।
सभापति थापाले पार्टीबाट टाढिएका मतदाता र उनीहरूका परिवारलाई पुनः जोड्न संवाद आवश्यक रहेको बताए। पार्टीको आन्तरिक निर्वाचनलाई स्वाभाविक रूपमा लिनुपर्ने उल्लेख गर्दै उनले विगतका प्रतिस्पर्धाका कारण सम्बन्धमा देखिएको कटुता हटाउनुपर्ने बताए। पार्टीभित्रका संस्थागत गुटहरू समाप्त भइसकेको दाबी गर्दै उनले अब आपसी सम्बन्ध सुधारेर कांग्रेसलाई एकताबद्ध बनाउनुपर्ने धारणा राखे।
कांग्रेसमा २० वर्षदेखि ८० वर्षसम्मका चार पुस्ता एकैसाथ सक्रिय रहेको उल्लेख गर्दै सभापति थापाले यसलाई पार्टीको विशिष्ट पुँजीका रूपमा चित्रण गरे। उनले विगतमा पार्टीबाट भएका कमी-कमजोरी सच्याउँदै लोकतन्त्रको रक्षामा केन्द्रित हुने प्रतिबद्धता पनि व्यक्त गरे।
कार्यक्रममा गण्डकी प्रदेशका मुख्यमन्त्री तथा कांग्रेस नेता सुरेन्द्रराज पाण्डेले पनि संवादको आवश्यकता औंल्याए। विगतमा कांग्रेसमा रहेका तर पछिल्लो समय अन्य दललाई मतदान गरेका मतदातालाई पुनः पार्टीसँग जोड्न संवाद आवश्यक रहेको उनको भनाइ थियो। कार्यक्रममा लामो समयदेखि कांग्रेसमा आबद्ध रहेर समाज रूपान्तरणमा योगदान पुर्याएका गण्डकी प्रदेशका ११ जिल्लाका अग्रज नेताहरूलाई सम्मान गरिएको थियो।
