मुम्बई — बलिउड अभिनेता इमरान खानलाई तोकिएको मितिभित्र भारत छाड्न भनिएको सूचनामाथि बम्बे उच्च अदालतले तत्काल रोक लगाएको छ। यो अन्तरिम आदेशसँगै उक्त सूचना नोभेम्बर २ सम्म कार्यान्वयनमा आउने छैन।
मुख्य न्यायाधीश महेशचन्द्र त्रिपाठी र न्यायाधीश अद्वैत सेठनाको संयुक्त इजलासले मंगलबार खानले दायर गरेको रिटमाथि सुनुवाइ गर्दै यस्तो आदेश दिएको हो। इजलासले यस विषयमा अर्को सुनुवाइ पनि नोभेम्बर २ का लागि नै तोकेको छ। सोमबारका लागि तय भएको सुनुवाइ स्थगित भएपछि यो सुनुवाइ मंगलबार भएको थियो।
मुम्बई प्रहरीले खानलाई अक्टोबर २८ भित्र भारत छाड्न सूचना दिएको थियो। भारतका मुख्य निर्वाचन आयुक्त ज्ञानेश कुमारको राजीनामा माग गर्दै मुम्बईको अगस्ट क्रान्ति मैदानमा भएको विरोध प्रदर्शनमा उनी सहभागी भएपछि प्रहरीले यस्तो सूचना जारी गरेको थियो। सोही क्रममा प्रहरीले उनलाई हिरासतमा समेत लिएको थियो।
भारतीय नागरिक नभए पनि राजनीतिक र आन्तरिक विरोध प्रदर्शनमा सहभागी भएको भन्दै उनीमाथि अध्यागमन ऐनको दफा ७ र २९ अन्तर्गत कारबाही अघि बढाइएको हो। खानसँग भारतीय नागरिकता छैन, उनी अमेरिकी नागरिक हुन् र ओभरसिज सिटिजन अफ इन्डिया कार्डमार्फत भारतमा बस्दै आएका छन्।
प्रहरीको सूचनापछि खानले वकिल जुल्फिकार मेमन र आफ्नो कानुनी टोलीमार्फत बम्बे उच्च अदालतमा रिट दायर गर्दै उक्त सूचनालाई गैरकानुनी र कानुनविपरीत भएको दाबी गरेका थिए। ओसीआई कार्डवाहकलाई शान्तिपूर्ण प्रदर्शनमा सहभागी हुनबाट रोक्ने कुनै प्रावधान वर्तमान कानुनमा नरहेको उनको जिकिर छ।
देश छाड्ने जस्तो गम्भीर सूचना जारी गर्नुअघि आफूलाई कुनै स्पष्ट कारण नदिइएको र आफ्नो पक्ष राख्ने मौका समेत नदिइएको उनको भनाइ छ। उनले उक्त सूचना खारेज गर्न अदालतसँग माग गरेका छन्।
