नेपालका पौराणिक तीर्थस्थलहरूको प्रचार गर्दै धार्मिक पर्यटन बढाउने, राष्ट्रिय एकता बलियो बनाउने, सनातन वैदिक संस्कृतिको रक्षा गर्ने र वैदिक विश्वविद्यालय स्थापना गर्ने लक्ष्यसहित देशव्यापी रथयात्रा सुरु भएको छ। मुक्तिनाथका पीठाधीश्वर स्वामी कमलनयनाचार्यले गत आइतबार मुक्तिनाथधामबाट यात्राको शुभारम्भ गरेका हुन्। उनकै सत्सङ्कल्पमा नेपाल तीर्थस्थल विकास राष्ट्रिय समितिको आयोजनामा यात्रा सुरु भएको हो।
रथयात्रा बागलुङको पञ्चकोट हुँदै अघि बढेको छ। यो यात्रा पूर्वको मेचीदेखि पश्चिमको महाकालीसम्मका धार्मिक, सांस्कृतिक तथा ऐतिहासिक महत्त्व भएका पवित्रस्थलहरूमा पुग्नेछ। मङ्सिर १ गतेसम्म देशभर परिक्रमा गर्ने कार्यक्रम रहेको छ।
स्वामी कमलनयनाचार्यले यात्राको उद्देश्य धार्मिक अनुष्ठानमा मात्र सीमित नरहेको बताए। उनका अनुसार यसले राष्ट्रिय एकताको भावना जगाउने, सामाजिक सद्भाव र सहिष्णुता बढाउने, सनातन संस्कृतिका मौलिक मूल्यको संरक्षण गर्ने र नेपालको धार्मिक सम्पदालाई नयाँ पुस्तामाझ परिचित गराउने लक्ष्य राखेको छ। तीर्थस्थलहरूबीच धार्मिक तथा सांस्कृतिक सम्बन्ध विस्तार गरी आन्तरिक पर्यटन, तीर्थाटन र स्थानीय आर्थिक गतिविधिलाई प्रोत्साहन गर्नु पनि अभियानको उद्देश्य रहेको उनको भनाइ थियो।
यात्राको विश्राम मङ्सिर १ गते नवलपुरको श्रीगजेन्द्रमोक्षधाम, त्रिवेणीधाममा हुनेछ। सोही दिनदेखि त्यहाँ वैदिक विश्वविद्यालय स्थापना गर्ने उद्देश्यसहित अष्टाचल धनधान्याचल श्रीगजेन्द्रमोक्ष नारायण वैभव विराट महायज्ञ सुरु हुनेछ। महायज्ञ मङ्सिर महिनाभर चल्नेछ। यात्राका क्रममा भगवान् श्रीमुक्तिनाथको पवित्र जल तथा प्रसाद वितरण गरिनेछ। रथयात्रा पुग्ने स्थानका श्रद्धालुलाई दर्शन गर्न, पवित्र जल र प्रसाद ग्रहण गर्न तथा अभियानमा सहभागी हुन आह्वान गरिएको छ।
