चितवन — पूर्वी चितवनका तीन नगरपालिकामा फैलिएको धान जोनमा यस वर्ष धानको उत्पादन उल्लेख्य रूपमा बढ्ने देखिएको छ। गत वर्षको तुलनामा करिब पाँच हजार मेट्रिक टन बढी धान फल्ने प्रक्षेपण गरिएको छ।
भरतपुरस्थित राष्ट्रिय कृषि आधुनिकीकरण कार्यक्रम कार्यान्वयन एकाइका सूचना अधिकारी सौरज विश्वकर्माका अनुसार गत वर्ष आठ हजार ५०० हेक्टर क्षेत्रफलमा ४५ हजार मेट्रिक टन धान उत्पादन भएको थियो। यस वर्ष सोही क्षेत्रबाट उत्पादन बढेर ५० हजार मेट्रिक टन पुग्ने अनुमान छ। बाली काटेर गरिएको परीक्षणका नतिजाले पनि उत्पादन बढेको देखाएको उनले बताए।
धान जोनमा रत्ननगर, खैरहनी र राप्ती नगरपालिका पर्छन्। यी क्षेत्रमा हर्दिनाथ, सावा मन्सुली, झुरे सावा, गोरखनाथ, राधाचार र सावित्री जातका धान लगाइएको छ। जोनअन्तर्गत खैरहनीका वडा नं ५ देखि ७ र ९ देखि १३, राप्तीका वडा नं १ देखि ४ र ६ तथा रत्ननगरका वडा नं ३ देखि ९ सम्मका खेत समेटिएका छन्। यसमा स्थानीय कृषि समूह र फार्महरू सहभागी छन्।
जिल्लाभरको कुल उत्पादनको तथ्याङ्क भने अझै आउन बाँकी छ। कृषि विकास कार्यालय चितवनका कृषि अर्थविज्ञ निर्मल पौडेलका अनुसार जिल्लाभर अहिले बाली काटेर उत्पादन नाप्ने काम भइरहेको छ र त्यसपछि मात्र समग्र उत्पादनको विवरण सार्वजनिक हुनेछ।
