हिम पर्वत हाइड्रोपावरले आज बुधबारदेखि प्राथमिक सेयर निष्कासन सुरु गरेको छ। पहिलो चरणमा आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीलाई सेयर बिक्री गरिँदै छ।
कम्पनीले आफ्नो जारी पुँजी १ अर्ब ६९ करोड रुपैयाँको ३५ प्रतिशत अर्थात् ५९ करोड १५ लाख रुपैयाँ बराबरको ५९ लाख १५ हजार कित्ता सेयर निष्कासन गर्न अनुमति पाएको थियो। त्यसको एउटा हिस्सा स्थानीय बासिन्दाका लागि छुट्याइएको छ।
स्थानीय बासिन्दाका लागि प्रतिसेयर १०० रुपैयाँका दरले १६ करोड ९० लाख रुपैयाँ बराबरको १६ लाख ९० हजार कित्ता सेयर बिक्रीमा ल्याइएको छ। त्यसमा दोलखाको बिगु गाउँपालिका वडा नम्बर ५, ६, ७ र ८ तथा कालिञ्चोक गाउँपालिका वडा नम्बर २, ३ र ४ का स्थायी बासिन्दाका लागि १० लाख १४ हजार कित्ता र दुवै गाउँपालिकाका अन्य वडाका बासिन्दाका लागि ६ लाख ७६ हजार कित्ता छुट्याइएको छ।
वैदेशिक रोजगारीमा रहेका नेपालीका लागि ४ करोड २२ लाख ५० हजार रुपैयाँ बराबरको ४ लाख २२ हजार ५०० कित्ता सेयर बिक्री गरिँदै छ। आवेदन दिन न्यूनतम १० कित्ता र अधिकतम १० हजार कित्तासम्म पाइने व्यवस्था छ।
स्थानीय बासिन्दाका लागि आवेदन अवधि छिटोमा कात्तिक २५ र ढिलोमा मंसिर १० सम्म छ। वैदेशिक रोजगारीमा रहेका नेपालीले कात्तिक १६ सम्म आवेदन दिन सक्छन्। सबै कित्ताका लागि आवेदन नपरेमा अवधि कात्तिक २५ सम्म लम्बिने छ।
इक्रा नेपालले कम्पनीलाई ‘इक्रा एनपी इस्युअर रेटिङ डबल बी प्लस’ दिएको छ, जसले दायित्व पूरा गर्ने क्षमतामा औसत जोखिम देखाउँछ। सेयर निष्कासन तथा बिक्री प्रबन्धक सिटिजन्स क्यापिटल रहेको छ।
