काठमाडौँ — विदेशमा पैसा पठाउने कामलाई छिटो, सुरक्षित र झन्झटरहित बनाउने उद्देश्यले एनएमबि बैंक लिमिटेडले विश्वव्यापी डिजिटल भुक्तानी संस्था भिजासँग सम्झौता गरेको छ। यो सहकार्यअन्तर्गत बैंकले ‘भिजा डाइरेक्ट टु एकाउन्ट’ सेवा सञ्चालनमा ल्याउनेछ।
नयाँ सेवामार्फत बैंकका ग्राहकले विभिन्न देशमा सिधै खातामा रकम पठाउन सक्नेछन्। प्रयोग गर्न सजिलो डिजिटल प्रणालीबाट रकम स्थानान्तरण गर्दा लामो प्रक्रिया र ढिलाइबाट बच्न सकिने बैंकको भनाइ छ। अन्तर्राष्ट्रिय भुक्तानीमा सुरक्षा र भरपर्दोता नै यस सेवाको मुख्य विशेषता हुने बताइएको छ। सम्झौतापछि ग्राहकले विश्वका विभिन्न मुलुकमा रकम पठाउने नयाँ र भरपर्दो विकल्प पाउने बैंकले जनाएको छ।
भिजाको यो प्रविधि विश्वका १९५ भन्दा बढी देश तथा क्षेत्रमा प्रयोग भइरहेको छ। त्यसैले यो साझेदारीले नेपालबाट हुने अन्तर्राष्ट्रिय भुक्तानीलाई अझ व्यवस्थित र प्रभावकारी बनाउने बैंकको विश्वास छ। बैंकले आफ्नो अन्तर्राष्ट्रिय भुक्तानी प्रणालीलाई विस्तार गर्ने योजनाअन्तर्गत यो कदम चालेको हो।
एनएमबि बैंकले हाल देशभर १९७ शाखा, १७६ एटिएम र ९ एक्स्टेन्सन काउन्टरबाट सेवा दिँदै आएको छ। डिजिटल वित्तीय सेवामा नयाँ प्रयोग गर्दै आएको बैंकले यो सेवाले विदेशमा रकम पठाउने ग्राहकलाई प्रत्यक्ष लाभ पुग्ने जनाएको छ।
