कोशी प्रदेशका उद्योगहरूले आफ्नो उत्पादन क्षमताको आधा भाग पनि प्रयोग गर्न सकेका छैनन्। नेपाल राष्ट्र बैंकको अध्ययनले गत आर्थिक वर्ष २०८२/८३ मा प्रदेशका उद्योगहरूको भारित औसत क्षमता उपयोग ४३.१ प्रतिशत पुगेको देखाएको छ। अघिल्लो आर्थिक वर्ष २०८१/८२ मा यस्तो उपयोग ४१.८ प्रतिशत थियो।
उत्पादित वस्तुअनुसार भटमासको तेल बनाउने उद्योगको क्षमता उपयोग सबैभन्दा बढी ११८ प्रतिशत पुगेको छ भने वनस्पति घिउ बनाउने उद्योगको सबैभन्दा कम ६.५ प्रतिशत मात्र छ। गत आव भटमासको तेलको उत्पादन ४५.३ प्रतिशत, वनस्पति घिउ ३०.५ प्रतिशत, तोरीको तेल ११.९ प्रतिशत, चामल २८.१ प्रतिशत, पशुदाना १५ प्रतिशत, चिनी १३.६ प्रतिशत, चाउचाउ १२.६ प्रतिशत, प्लास्टिक सामान १४.५ प्रतिशत र घरेलु धातुका सामानको उत्पादन २८७.८ प्रतिशतले बढेको अध्ययनमा उल्लेख छ।
गत आव कोशीको आर्थिक वृद्धि ३.१३ प्रतिशत रहने प्रारम्भिक अनुमान छ, जुन अघिल्लो आवको २.७२ प्रतिशतभन्दा बढी हो। कुल गार्हस्थ उत्पादनमा कृषि क्षेत्रको योगदान ३२.४७ प्रतिशत, उद्योगको १६.६७ प्रतिशत र सेवा क्षेत्रको ४९.८५ प्रतिशत रहने अनुमान गरिएको छ। सोही अवधिमा प्रदेशमा बैंक तथा वित्तीय संस्थाको निक्षेप १६.१ प्रतिशतले बढेर ६ खर्ब ४१ अर्ब ९३ करोड रुपैयाँ र कर्जा प्रवाह ४.२ प्रतिशतले बढेर ६ खर्ब ३९ अर्ब ३२ करोड रुपैयाँ पुगेको छ। उद्योगमा प्रवाहित कर्जा ८.२ प्रतिशतले बढेर १ खर्ब ७३ अर्ब रुपैयाँ पुगेको छ।
