जनकपुरधाममा राष्ट्रिय स्वतन्त्र पार्टीको मधेस प्रदेश समितिले धनुषाका निलम्बित जिल्ला सभापति लक्ष्मेश्वर यादवसँग तीन दिनभित्र लिखित स्पष्टीकरण मागेको छ। प्रदेश समितिले यादवलाई पठाएको पत्रमा सार्वजनिक अभिव्यक्तिबारे पाँच वटा प्रश्नमा बुँदागत जवाफ पेस गर्न निर्देशन दिइएको छ।

पत्रमा पार्टीका विभिन्न कार्यक्रममा यादवले व्यक्त गरेका भनाइ समेटिएको भिडियो सामाजिक सञ्जालमा सार्वजनिक भएको उल्लेख छ। त्यस विषयमा जिल्ला प्रहरी कार्यालय धनुषाले २०८३ कात्तिक ९ गते प्रेस विज्ञप्ति जारी गरेको पनि पत्रमा उल्लेख गरिएको छ।

समितिले भिडियोमा देखिएको अभिव्यक्ति यादवकै हो वा होइन भन्ने स्पष्ट पार्न भनेको छ। अभिव्यक्ति आफ्नै भए त्यसको उद्देश्य, सन्दर्भ र आशय खुलाउन भनिएको छ। जिल्ला प्रहरी कार्यालय धनुषाका प्रमुखलाई लक्षित गरी व्यक्त गरिएका भनाइ तथा लगाइएका आरोपको आधार र त्यसलाई पुष्टि गर्ने तथ्य वा प्रमाण पेस गर्न पनि निर्देशन दिइएको छ।

प्रहरीको विज्ञप्तिमा उल्लेख भएअनुसार परिवारकी एक महिला सदस्य हराएको भन्दै यादवले दिएको खोजतलाससम्बन्धी निवेदनको घटनाबारे पनि स्पष्टीकरण मागिएको छ। पदको दुरुपयोग गरी प्रहरीमाथि दबाब दिएको भन्ने प्रहरीको दाबीप्रति धारणा स्पष्ट पार्न भनिएको छ। प्रहरी कार्यालय घेराउ गर्ने वा धम्की दिने आशयको अभिव्यक्ति दिएको भए त्यसको उद्देश्य र आधार खुलाउन पनि समितिले भनेको छ। सार्वजनिक अभिव्यक्ति पार्टीको विधान, अनुशासन र आचारसंहितासँग सम्बन्धित रहेकाले त्यो विषयमा पनि धारणा मागिएको छ।

तोकिएको अवधिमा जवाफ नदिएमा वा स्पष्टीकरण चित्तबुझ्दो नभएमा विधान र कार्यविधिअनुसार आवश्यक निर्णय प्रक्रिया अघि बढाइने पत्रमा उल्लेख छ। अर्को निर्णय नभएसम्म यादवलाई सार्वजनिक कार्यक्रममा पार्टीको प्रतिनिधित्व नगर्न, भेला तथा बैठकमा सहभागी नहुन र जिल्ला पार्टी कार्यालय नियन्त्रणमा लिएर प्रयोग नगर्न निर्देशन दिइएको छ। जिल्ला पार्टी कार्यालयको साँचो प्रदेश सभापतिमार्फत कार्यवाहक सभापतिलाई तीन दिनभित्र हस्तान्तरण गर्न पनि भनिएको छ।