नेपाल प्रहरीका महानिरीक्षक दानबहादुर कार्कीले जस्तोसुकै चुनौती आए पनि शान्ति सुव्यवस्था कायम गर्न प्रहरी थप प्रभावकारी रूपमा परिचालित हुनुपर्ने बताएका छन्। नागरिकका गुनासोको उचित सम्बोधन गर्दै सेवामा पूर्ण रूपमा समर्पित भएर काम गर्नुपर्ने उनको भनाइ थियो।
प्रहरी प्रधान कार्यालयबाट भर्चुअल माध्यममार्फत बुधबार सम्बोधन गर्दै उनले नजिकिँदै गरेका दीपावली, नेपाल संवत् र छठलगायत पर्वका बेला अपनाउनुपर्ने सुरक्षा संवेदनशीलताबारे निर्देशन दिए। चाडपर्वका बेला हुन सक्ने लुटपाट, चोरी र अन्य आपराधिक गतिविधिलाई समयमै सम्बोधन गर्न विशेष सुरक्षा योजना लागू गरेर प्रहरी परिचालन गर्नुपर्ने उनले बताए।
सवारी दुर्घटना घटाउन सरोकारवाला पक्षसँग समन्वय गर्दै सवारीसाधनको यान्त्रिक जाँच, लापसे, मापसे र ओभरलोड नियन्त्रणमा विशेष ध्यान दिन उनले निर्देशन दिए। यात्रुको सहज र सुरक्षित आवागमन मिलाउनुका साथै ट्राफिक नियम उल्लंघन गर्नेमाथि कारबाही र चेतनामूलक सन्देश प्रवाह गर्नुपर्ने उनको भनाइ थियो।
सीमा नाकामा तस्करी र आपराधिक गतिविधि नियन्त्रण, फरार प्रतिवादी पक्राउ, जुवातास तथा पटका र विस्फोटक पदार्थको कारोबार नियन्त्रणमा सक्रिय हुन पनि उनले भने। काठमाडौंमा चलिरहेको नेपाल प्रिमियर लिगमा अनलाइन बेटिङ नियन्त्रण गर्न प्रविधिको उच्चतम् प्रयोग गर्नुपर्ने निर्देशन उनले दिए।
बिहीबारदेखि मेघगर्जन, चट्याङ, हावाहुरी र भारी वर्षाको सम्भावना रहेकाले जोखिमस्थल पहिचान गरी उच्च सतर्कता अपनाउन उनले भने। होल्डिङ सेन्टरमा रहेका महिला, बालबालिका र ज्येष्ठ नागरिकविरुद्ध हुन सक्ने अपराध नियन्त्रणमा संवेदनशील हुनुपर्ने उनको भनाइ थियो। कार्यक्रममा काठमाडौं उपत्यका प्रहरी कार्यालयका प्रमुख सुशील सिंह राठौर र सातै प्रदेशका प्रहरी प्रमुखहरूले आ–आफ्नो क्षेत्रको सुरक्षा जानकारी दिएका थिए।
