कास्कीको धम्पुसमा साथीहरूबीच सुरु भएको सामान्य विवादले ज्यानै लिने घटना भएको छ। प्रहरीका अनुसार अत्यधिक मदिरा सेवनपछि बढेको आवेग र इगोका कारण राजेन्द्र पौडेलको मृत्यु भएको हो। घटनामा संलग्न भएको आरोपमा पाँच जनालाई पक्राउ गरिएको छ।

राजेन्द्र दसैंअघि ट्रेकिङ गएका थिए। भारी बोकेर कमाएको पैसाले उनले गाउँकै चिनजानका साथीहरूलाई रेस्टुरेन्टमा मदिरा र बियर खुवाउने निधो गरे। रक्सी पिउँदै जाँदा विवाद सुरु भयो। त्यस क्रममा उनले नजिकैको मौरीको घार फुटाइदिए। साथीहरूले घार किन फुटाएको भनेर पटक पटक सोधेपछि उनले साथी आशिषको खुट्टामा र अर्का साथी मिलनको घाँटीमा हँसियाले हाने। त्यसपछि सबैजना छुट्टिएर आ–आफ्नो घरतिर लागे।

तर विवाद त्यहीँ सकिएन। आफूमाथि हँसिया प्रहार भएको भन्दै आशिषले त्यसै नछोड्ने निधो गरे। राति करिब १२ बजे उनले विक्रम र लिलबहादुरलाई फोन गरेर बोलाए। अरू दुई जना साथीसहित उनीहरू राजेन्द्रको घरमा पुगेर आक्रमण गरे। कास्की प्रहरीका सूचना अधिकारी वीरेन्द्र पासवानका अनुसार राजेन्द्रलाई घिसारेर बारीमा लगिएको थियो। उनको शरीरभरि चोट देखिएको थियो।

कास्की प्रहरी प्रमुख एसपी नवीन कार्कीका अनुसार घटनामा पूर्वरिसइबी, पूर्वयोजना वा आपराधिक उद्देश्य देखिँदैन। सबैजना एउटै टोलका र सँगै उठबस गर्ने साथीभाइ हुन्। अनुसन्धानमा राजेन्द्रले दिदी भिनाजुको घरमा मोबाइल मागेको र नपाएपछि फुटाइदिएको खुलेको छ।

पक्राउ पर्नेमा माछापुच्छ्रे गाउँपालिका–७ का विक्रम पुन, आशिष गुरुङ, महादेव विक, मिलन विक र लिलबहादुर पुन छन्। कास्की जिल्ला अदालतबाट पाँच दिनको म्याद थप गरी अनुसन्धान भइरहेको छ। घटना कात्तिक ८ गते रातिको हो। कात्तिक ९ गते बिहान स्थानीयले बारीमा शव देखेपछि प्रहरीलाई खबर गरेका थिए। प्रहरीले भाटा, दाउरा, हँसिया, बियर र पानीका बोतल बरामद गरेको छ।