काठमाडौँ — नेपाली कथानक चलचित्र ‘गौँथली’ ले फ्रान्सको कान्समा हुने वल्र्ड फिल्म फेस्टिभलमा उत्कृष्ट विदेशी चलचित्रको अवार्ड जितेको छ। ‘रिमेम्बर द फ्युचर’ भनेर पनि चिनिने यो महोत्सव फ्रान्समा हरेक महिना र वर्षमा आयोजना हुँदै आएको छ, र त्यही मञ्चमा नेपाली चलचित्रले यो उपलब्धि हासिल गरेको हो।
अवार्ड पाएपछि निर्देशक डा. कपिल रिजालले ‘गौँथली’ लाई आफूले चलचित्र मात्र नभई भावना, सपना र नेपाली सिनेमाप्रतिको मायासँग जोडिएको सुन्दर यात्रा भनेर वर्णन गरे। उनका अनुसार पच्चीस वर्षअघि आफ्ना बुबा डा. भोला रिजालले बनाएको गीति चलचित्र ‘गौँथली’ को भाव र विरासतलाई नयाँ पुस्तासम्म नयाँ शैलीमा पुर्याउने आफ्नो प्रयास सानो भए पनि अर्थपूर्ण छ।
चलचित्रका निर्माता सुमन गिरीले यो सफलतालाई नेपाली चलचित्रको गौरवमय इतिहास भएको बताए। उनले यो जित नेपाली चलचित्रकै जित भएको र नेपाली माटोको जित भएको उल्लेख गरे।
प्रदर्शन सुरु भएको सय दिन पूरा गरिसकेको यो चलचित्रले २६ करोड रुपैयाँभन्दा बढी व्यापार गरेको दाबी गरिएको छ। यससँगै ‘गौँथली’ नेपाली चलचित्र उद्योगकै दोस्रो धेरै कमाउने चलचित्र बनेको छ। चलचित्रमा अरुण क्षेत्री र सिम्रन खड्का मुख्य भूमिकामा रहेका छन्।
