बूढीगण्डकी बाढीले पुल र बाटो बगाएपछि उत्तरी गोरखाको मनास्लु क्षेत्रमा उत्पादन भएका स्याउ गोदाममै थन्किएका छन्। ढुवानीको विकल्प नभएपछि किसानले स्याउ बिग्रन थालेको गुनासो गरेका छन्।
गत असोज २५ मा चुमनुब्री गाउँपालिका–६ मा हिमपहिरोले खोलो थुनिएपछि आएको बाढीले दर्जनौँ पुल र सडक बगाएको थियो। बेनिघाट–आरुघाट–लार्के सडक अवरुद्ध भएपछि स्याउ ढुवानी गर्नसक्ने अवस्था नरहेको व्यवसायी लाक्पा डुन्डुप लामाले बताए। गाउँपालिकाले मान्छे हिँड्ने बाटो बनाए पनि खच्चड हिँडाउन नसकिने उनको भनाइ छ।
लामाले चुमनुब्री–४ नाम्रुङमा दुई हजार ६५० मिटर उचाइमा १२ हजार ५०० बोटमा स्याउखेती गरेका छन्। यस वर्ष गाला, गोल्डेन, रेड डिलिसियस, किङ डेलिसियस र फुजी जातका गरी एक लाख केजी स्याउ उत्पादन भएको छ। फुजीबाहेक सबै स्याउ टिपिसकिएको छ। गाला र गोल्डेन टिपेको एक महिना भयो र अहिले बिग्रन थालिसकेको उनले बताए।
भदौ २१ मा आएको बाढीले लघु जलविद्युत् बगाएर विद्युत् नहुँदा ड्रायर नचलेको र स्याउको सुकुटी बनाउन नसकिएको पनि उनले बताए। मनास्लु क्षेत्रमा स्याउ ढुवानी हरेक वर्ष कठिन हुने भए पनि यस वर्ष बाढीले समस्या थप चर्को बनाएको छ। खच्चडमार्फत बजार पुर्याउन करिब एक हप्ता लाग्ने र २०–२५ प्रतिशत स्याउ खेर जाने किसानको भनाइ छ। हेलिकोप्टरबाट ढुवानी गर्दा मूल्य बढ्ने भएकाले त्यो विकल्प पनि सहज छैन।
