चितवनमा सवारी चालक अनुमतिपत्रका लागि लिइने लिखित र सीप परीक्षा तीन महिनादेखि रोकिएको छ। सर्वोच्च अदालतको आदेशपछि गत साउन १० गतेदेखि परीक्षा बन्द हुँदा चितवनसँगै छिमेकी जिल्लाबाट सेवा लिन आउने सर्वसाधारण समस्यामा परेका छन्।
यातायात व्यवस्था कार्यालय भरतपुरका सूचना अधिकारी गोविन्द पौडेलका अनुसार अदालतले जिल्लाको एउटा निजी ट्रायल सेन्टरमा सञ्चालित सेवामा रोक लगाएपछि परीक्षा सञ्चालन हुन सकेको छैन। अदालतले उक्त सेन्टरको ठेक्का खारेज गरी फेरि ठेक्का गर्न भनेको उनको भनाइ छ।
परीक्षा रोकिँदा पुनःसीप परीक्षा दिने तयारीमा रहेका ८०० जनाको परीक्षा पनि स्थगित भएको छ। कार्यालयका अनुसार हरेक हप्ता पुनःसीप परीक्षा र नियमित परीक्षा दिने करिब दुई हजार सेवाग्राही यसबाट प्रभावित भएका छन्। ट्रायल सेन्टर सञ्चालनमा रहँदा एकपटकमा नयाँ र पुराना गरी ४०० जनाले परीक्षा दिन पाउँथे।
बोलपत्र आह्वानका लागि मन्त्रालयको निर्देशन पर्खिरहेको कार्यालयले जनाएको छ। मन्त्रालयको परिपत्र नआएसम्म प्रक्रिया अघि बढाउन नसकिने उनको भनाइ छ। कार्यालयले अहिले अनुमतिपत्र, सवारी धनी प्रमाणपत्र र रुट परमिटलगायतका कामबाहेक अन्य काम गर्न नसकेको जनाएको छ। परीक्षा कहिले सुरु हुन्छ भन्ने अझै निश्चित छैन, जसले गर्दा परीक्षाको तयारीमा रहेका धेरै सेवाग्राही अन्योलमा परेका छन्।
