लुम्बिनी प्रदेशका पूर्वमन्त्री तथा नेपाली कम्युनिस्ट पार्टी (नेकपा) का प्रदेश संयोजक सुदर्शन बरालले गृहमन्त्री सुधन गुरुङसँग कानुनले तोकेको सीमाभन्दा बढी जग्गा रहेको दाबी गरेका छन्। बुटवलमा आयोजित कार्यक्रममा बोल्दै उनले यस्तो अवस्थामा पनि गृहमन्त्रीमाथि कुनै कारबाही नभएको बताए। १२ कात्तिकमा रुपन्देहीमा आयोजित नेकपाको कार्यक्रममा उनले यो विषय उठाएका हुन्।
बरालका अनुसार सर्वसाधारण नागरिकसँग थोरै रकम भेटिँदा पनि राज्यले तत्काल कारबाही गर्छ, तर मन्त्रीको हकमा कानुनविपरीत जग्गा भेटिँदा पनि उही मापदण्ड लागू हुँदैन। उनले यसलाई सरकारको दोहोरो व्यवहारको उदाहरणका रूपमा प्रस्तुत गरे।
उनले रास्वपाका मन्त्री र सांसदहरूसँग सयौँ तोला सुन रहेको दाबी गर्दै त्यसबारे पनि कुनै छानबिन नभएको बताए। बालेनलाई करोडौँ मूल्यको गाडी चढ्न दिएको विवादमा मुछिएका व्यापारी कमल मालपानीमाथि समेत अनुसन्धान नभएको उनको भनाइ थियो।
बरालले अहिलेको सरकारले देशलाई ‘पुलिस स्टेट’ बनाउन खोजेको आरोप लगाए। नागरिकता विवादमा परेकी आनी छोइङ डोल्मालाई छानबिन गरेर कारबाही गर्नुको साटो लुम्बिनी विकास कोषमा नियुक्ति दिइएको भन्दै उनले त्यसप्रति आपत्ति जनाए। उनले विवादमा परेका व्यक्तिलाई जिम्मेवारी दिनु उचित नभएको भन्दै नियुक्तिको निर्णयमाथि प्रश्न उठाए।
