निर्वाचन आयोग र राष्ट्रिय परिचयपत्र तथा पञ्जीकरण विभागबीच मतदाता नामावलीलाई अझ शुद्ध, भरपर्दो र व्यवस्थित बनाउने समझदारी भएको छ। विभागको प्रणालीमा रहेका व्यक्तिगत विवरण प्रयोग गरेर नामावली अद्यावधिक र प्रमाणीकरण गर्ने उद्देश्यले दुई निकायले समझदारीपत्रमा हस्ताक्षर गरेका हुन्।
समझदारीअनुसार विभागले ‘व्यक्तिगत घटना दर्ता तथा सामाजिक सुरक्षा व्यवस्थापन सूचना प्रणाली’ मा रहेका विवरण सुरक्षित प्राविधिक माध्यमबाट आयोगलाई उपलब्ध गराउनेछ। आयोगले ती विवरणका आधारमा नामावली अद्यावधिक गर्नेछ र मतदाताको विवरण जाँच्नेछ। यसले मृत्यु भएका व्यक्तिको नाम हटाउन तथा बसाइँसराइ र अन्य विवरण सच्याउन सजिलो हुने अपेक्षा गरिएको छ।
समझदारीपत्रमा आयोगका तर्फबाट सहसचिव राजेन्द्र कुमार के.सी. र विभागका तर्फबाट महानिर्देशक कृष्ण पौडेलले हस्ताक्षर गरेका छन्। तथ्यांक आदानप्रदान गर्दा व्यक्तिगत विवरणको सुरक्षा र गोपनीयता जोगाउन आवश्यक प्रविधि विकास गरिने बताइएको छ। कार्यान्वयनका क्रममा आउन सक्ने प्राविधिक समस्या समाधान गर्न दुवै पक्षका प्रतिनिधि रहेको संयुक्त प्राविधिक कार्य समूह पनि गठन गरिनेछ।
आयोगका सहसचिव तथा प्रवक्ता नारायण प्रसाद भट्टराईले जारी गरेको विज्ञप्तिमा यो सहकार्यले नामावली अद्यावधिक र प्रमाणीकरणको काम थप व्यवस्थित, भरपर्दो र प्रभावकारी बनाउने अपेक्षा गरिएको उल्लेख छ। यसले नामावलीको शुद्धता कायम राख्नुका साथै निर्वाचन व्यवस्थापनमा सूचना प्रविधिको प्रयोग बलियो बनाउने विज्ञप्तिमा भनिएको छ।
