नेपाली कांग्रेसका सभापति गगन थापाले पार्टीलाई जनतासँग जोड्न मंसिर महिनाभरि देशव्यापी अभियान चलाइने बताएका छन्। नयाँ कार्यसमितिका सदस्यहरूको शपथग्रहणपछि सानेपास्थित पार्टी कार्यालयमा बसेको केन्द्रीय कार्यसमितिको पहिलो बैठकमा उनले ‘हामी तयार छौँ’ भन्ने सन्देशसहित अभियान सञ्चालन गरिने जानकारी दिए।
थापाका अनुसार छिट्टै पार्टीको पूर्ण बैठक बसेर सबैको धारणा सुनिनेछ र त्यसका आधारमा चार वर्षको क्यालेन्डर बनाएर अनुशासित रूपमा काम अघि बढाइनेछ। प्रतिपक्षको मुख्य जिम्मेवारी सरकारमाथि निगरानी गर्नु भएकाले कानुनको शासन उल्लंघनविरुद्ध कांग्रेस सशक्त रूपमा उभिने उनको भनाइ छ।
तिहार र छठलगत्तै लिडरसिप एकेडेमी, इलेक्सन ब्युरो र गभर्नन्स इन्स्टिच्युटले काम सुरु गर्ने थापाले बताए। नेता तथा कार्यकर्ताको रुचिअनुसार कार्यविभाजन गरिने र सहमहामन्त्रीहरूलाई स्पष्ट कार्ययोजनासहित जिम्मेवारी तोकिने उनले जानकारी दिए।
बैठकमा थापाले हलभित्र सोफामा बसेर ताली बजाउने परम्परागत शुभकामना आदानप्रदान कार्यक्रम अब नगर्ने घोषणा गरे। सरसफाइ, विपन्नलाई सहयोग वा समुदायसँग प्रत्यक्ष जोडिने रचनात्मक कार्यक्रम आयोजना भएमा मात्र आफू सहभागी हुने उनले निर्देशन दिए। यस्ता रचनात्मक कार्यक्रममार्फत पार्टी समुदायसँग प्रत्यक्ष रूपमा जोडिन चाहेको उनको भनाइ छ। नयाँ कार्यसमितिको पहिलो बैठक सानेपास्थित पार्टी कार्यालयमा बसेको थियो।
