नेपाल फुटबल लिग (एनएफएल) ले लिगमा तीन नयाँ क्लब भित्र्याउने प्रक्रिया औपचारिक रूपमा अघि बढाएको छ। लिग व्यवस्थापनले विराटनगर, धरान, जनकपुर, वीरगञ्ज, हेटौंडा, भक्तपुर, नेपालगञ्ज र सुर्खेतलाई प्रतिनिधित्व गर्ने क्लब स्थापनाका लागि शुक्रबार बोलपत्र आह्वान गरेको हो।
इच्छुक पक्षले आगामी १६ नोभेम्बर २०२६, अर्थात् ३० कात्तिक २०८३ भित्र बोलपत्र बुझाउनुपर्नेछ। बोलपत्र फारामको शुल्क ५० हजार रुपैयाँ तोकिएको छ र यो रकम फिर्ता हुने छैन।
आवेदनसँगै इच्छुक पक्षले आफ्नो व्यावसायिक र वित्तीय पृष्ठभूमि, आगामी १० वर्षको क्लब सञ्चालन योजना तथा सामाजिक विश्वसनीयतासम्बन्धी विवरण पेस गर्नुपर्नेछ। लिगले यी विवरणका आधारमा नयाँ क्लब छनोट गर्ने जनाएको छ।
यसैबीच, नेपाली फुटबललाई व्यावसायिक बनाउने लक्ष्यसहित एनएफएलको पहिलो संस्करण आगामी फागुन १ गतेदेखि सुरु हुँदैछ। पहिलो संस्करणमा काठमाडौं रेजर्स, ललितपुर सिटी, एफसी चितवन, पोखरा थन्डर्स, बुटवल लुम्बिनी, धनगढी एफसी र झापा एफसी गरी सात टोलीले खेल्ने यसअघि नै निश्चित भइसकेको छ।
रंगशालाको उपलब्धताका आधारमा प्रतियोगिता होम एन्ड अवे प्रणालीमा खेलाइने योजना छ। तयारी अवधिसहित लिग करिब चार महिनासम्म सञ्चालन हुने बताइएको छ।
