युक्रेनका राष्ट्रपति भोलोदिमिर जेलेन्स्की शनिबार टर्कीको राजकीय भ्रमणमा जाने भएका छन् । इस्तानबुलमा हुने भेटवार्तामा उनले टर्कीका राष्ट्रपति रेसेप तैयप एर्दोगानसँग रुससँग जारी युद्ध र कालोसागर क्षेत्रको सुरक्षाबारे छलफल गर्नेछन् ।
टर्कीको राष्ट्रपति कार्यालयले भ्रमणको कार्यक्रम सार्वजनिक गरेको हो । कार्यालयका सञ्चार निर्देशक बुर्हानेत्तिन दुरानले सामाजिक सञ्जाल एक्समार्फत दुई नेताबीच द्विपक्षीय सहकार्य थप बलियो बनाउने उपायका साथै क्षेत्रीय र अन्तर्राष्ट्रिय परिस्थितिबारे पनि कुराकानी हुने जानकारी दिएका छन् ।
रुस र युक्रेन दुवैसँग सम्बन्ध कायम राखेको टर्की कालोसागरमा व्यापारिक जहाजमाथि भइरहेका आक्रमणबाट असन्तुष्ट छ । राष्ट्रपति एर्दोगानले सेप्टेम्बरमा संयुक्त राष्ट्रसङ्घको महासभामा यस्ता आक्रमण अस्वीकार्य भएको बताएका थिए । अङ्काराले नागरिक जहाजमाथिको आक्रमण रोक्न रुस र युक्रेन दुवैलाई प्रस्ताव पठाए पनि दुवै पक्षले त्यसमा कुनै पहल गरेका छैनन् ।
टर्कीले रुस र युक्रेनबीच दिगो युद्धविराम र शान्ति सम्झौताका लागि यसअघि धेरै चरणका वार्ता आयोजना गरिसकेको छ । बुधबार अमेरिकी राष्ट्रपति डोनाल्ड ट्रम्पसँगको टेलिफोन वार्तामा एर्दोगानले युक्रेन र रुसबीच कूटनीतिक प्रक्रिया फेरि सुरु गर्न र वार्तामार्फत युद्ध अन्त्य गर्न टर्की तयार रहेको बताएका थिए ।
