युक्रेनको मध्य भागमा रहेको डिप्रोपेट्रोभ्स्क क्षेत्रमा रुसी आक्रमणपछि दुई लाखभन्दा बढी मानिस बिजुलीविहीन भएका छन्। शुक्रबार अधिकारीहरूले दिएको जानकारीअनुसार आक्रमणले क्षेत्रको विद्युत् संरचनामा गम्भीर क्षति पुर्याएको छ र ठूलो क्षेत्रमा आपूर्ति अवरुद्ध भएको छ।
क्षेत्रको एउटा रेलवे स्टेसनमा भएको घातक रुसी ड्रोन आक्रमणको भोलिपल्ट यो अवस्था सिर्जना भएको हो। युक्रेनको वायु सेनाका अनुसार रुसले रातभर ब्यालेस्टिक मिसाइल र ड्रोन प्रयोग गरेर डिप्रोपेट्रोभ्स्कसहित विभिन्न क्षेत्रमा आक्रमण गरेको थियो। त्यसपछि डिप्रो सहरमा व्यापक विद्युत् अवरोध देखिएको छ।
विद्युत् कम्पनी डीटीईकेले ग्रिड सञ्चालक उक्रेनेर्गोले डिप्रो सहरभर, छिमेकी जिल्ला र पावलोग्राड जिल्लाका केही भागमा आपतकालीन बिजुली कटौतीको आदेश दिएको जनाएको छ। कम्पनीका अनुसार आक्रमणले क्षेत्रको विद्युत् उपकरणमा गम्भीर क्षति पुगेको छ। ऊर्जाकर्मीहरू रातभर खटिएर महत्त्वपूर्ण पूर्वाधारमा विद्युत् सेवा फर्काउने प्रयासमा छन्।
डिप्रोपेट्रोभ्स्कका गभर्नर ओलेक्सान्द्र गान्जाले टेलिग्राममार्फत विद्युत् काटिएका अधिकांश उपभोक्तामा आपूर्ति फर्काइसकिएको बताएका छन्। तर दुई लाखभन्दा बढी ग्राहक अझै बिजुलीविहीन रहेको उनले जानकारी दिए।
डिप्रोका मेयर बोरिस फिलातोभले नागरिकलाई कम्तीमा एक–दुई दिनका लागि पानी भण्डार गरेर राख्न आग्रह गरेका छन्।
यसैबीच रुसको रक्षा मन्त्रालयले आफ्ना हवाई रक्षा प्रणालीले रातभर रुसी क्षेत्रमा एक हजारभन्दा बढी युक्रेनी ड्रोन खसालेको दाबी गरेको छ।
युद्धभर रुसले युक्रेनको ऊर्जा पूर्वाधारलाई निशाना बनाउँदै आएको छ। युक्रेनले यस्ता आक्रमणलाई युद्ध अपराध भनेको छ। जाडोअघि विद्युत् पूर्वाधारमा आक्रमण गरेर सरकारविरोधी जनमत सिर्जना गर्न खोजिएको युक्रेनको आरोप छ। यस्ता आक्रमणले लाखौँ मानिस चिसोमा ताप र बिजुलीबाट वञ्चित हुने गरेका छन्।
बिहीबार डिप्रोको एउटा व्यस्त रेलवे प्लेटफर्ममा रुसी ड्रोन खसेको थियो। उक्त आक्रमणमा कम्तीमा १४ जनाको मृत्यु भएको थियो भने एक दर्जनभन्दा बढी घाइते भएका थिए। राष्ट्रपति भोलोदिमिर जेलेन्स्कीले त्यसलाई भयानक आक्रमण भनेका थिए।
