झापा । लामो समयदेखि अलपत्र परेको दमक–चिसापानी सडकको एक खण्डको निर्माणका लागि सरकारले नयाँ ठेक्का स्वीकृत गरेको छ । पुरानो निर्माण व्यवसायीले काममा ढिलाइ गरेपछि ठेक्का अन्त्य गरी नयाँ बोलपत्र आह्वान गरिएको थियो ।
दमकस्थित सडक डिभिजन कार्यालयका प्रमुख इन्जिनियर श्यामकुमार यादवका अनुसार झापाको दमकदेखि इलामको माङ्सेबुङ हुँदै पाँचथरको रबिसम्म जोडिने सडकको माङ्सेबुङ–लारुम्बा–चिसापानी खण्ड निर्माणका लागि नयाँ ठेक्का स्वीकृत गरिएको हो । उक्त खण्डको लम्बाइ २५ दशमलव ५ किलोमिटर छ ।
कार्यालयले काठमाडौँको एमएस महालक्ष्मी–जय धनञ्जय जेभीसँग एक अर्ब २२ करोड ७९ लाख ४४ हजार ८७२ रुपियाँमा ठेक्का स्वीकृत गरेको छ । उक्त ठेक्काका लागि जम्मा १९ वटा बोलपत्र परेका थिए ।
ठेक्का स्वीकृत गर्ने आशयको सूचना बुधबार प्रकाशित गरिएको र सात दिनको म्याद दिइएको यादवले जानकारी दिए ।
नयाँ प्रक्रिया अघि बढेपछि छिट्टै निर्माण व्यवसायीसँग औपचारिक सम्झौता हुने र तीन वर्षभित्र सडकको कालोपत्रे कार्य सम्पन्न गर्ने गरी निर्माण अघि बढाइने उनले बताए ।
सडक कालोपत्रेमा स्तरोन्नति हुने भएपछि झापा र इलामको पश्चिमी क्षेत्रका बासिन्दाले प्रत्यक्ष लाभ पाउने भएका छन् ।
