सल्यानको सिद्धकुमाख गाउँपालिकामा शुक्रबार साँझ भएको जिप दुर्घटनामा तीन जनाको ज्यान गएको छ भने सात जना घाइते भएका छन्।
श्रीनगरबाट टाकुरा गाउँतर्फ जाँदै गरेको लु.१ ज २३६८ नम्बरको जिप सिद्धकुमाख–२ को रातामाटे खोलानजिक सडकबाट करिब १५० मिटर तल खसेको थियो। दुर्घटना साँझ साढे ६ बजेतिर भएको प्रहरीले जनाएको छ।
ज्यान गुमाउनेमा सिद्धकुमाख–२ की ४२ वर्षीया कृष्णी बस्नेत, ४५ वर्षीया सीता विक र ४३ वर्षीय साउने रोका छन्। जिल्ला प्रहरी प्रमुख डिएसपी दीपक पातलीका अनुसार उनीहरूको घटनास्थलमै मृत्यु भएको हो।
घाइते हुनेमा २४ वर्षीय देवबहादुर विक, ५८ वर्षीया सुशीला चलाउने, १५ वर्षीय कमल बुढाथोकी, १३ वर्षीया राधिका चलाउने, २२ वर्षीय दीपक रोका, १० वर्षीय युवराज परियार र सात वर्षीया विमला बुढाथोकी छन्।
गम्भीर घाइते देवबहादुर विक र सुशीला चलाउनेलाई दाङ पठाइएको छ भने कमल बुढाथोकी, विमला बुढाथोकी र युवराज परियारलाई बाँकेको नेपालगन्ज लगिएको छ। बाँकी घाइतेको सल्यानमै उपचार भइरहेको छ।
जिपमा चालकसहित ११ जना सवार थिए। चालक सकुशल छन् र प्रहरी नियन्त्रणमा छन्। पानी परेका कारण उकालोमा जिप चिप्लिएर खसेको चालकले प्रहरीलाई बताएका छन्। घटनाबारे थप अनुसन्धान भइरहेको प्रहरीले जनाएको छ।
