मुस्ताङ । प्रतिकूल मौसमका कारण नेपाल–चीन सीमास्थित कोरला नाकामा पाँच सयभन्दा बढी कन्टेनर र दुई हजार पाँच सयभन्दा बढी विद्युतीय सवारीसाधन रोकिएका छन् । भन्सार जाँचपास र सामान लोड गर्न आएका ती सवारीसाधन बेनी–जोमसोम–कोरला सडक हुँदै दसैँपछि नाका क्षेत्र पुगेका थिए ।
समुद्री सतहबाट चार हजार ६१० मिटर उचाइमा रहेको कोरला क्षेत्रमा बिहीबार मध्यरातदेखि निरन्तर मध्यम वर्षा भइरहेको छ भने नाका क्षेत्रमा मध्यम हिमपात भएको छ । उपल्लो मुस्ताङको तापक्रम घटेर माइनस १२ डिग्री सेल्सियससम्म पुगेको छ । चिसो ह्वात्तै बढे पनि कोरला सडकमा आवागमन भने अवरुद्ध नभएको सशस्त्र प्रहरीले जनाएको छ ।
लोमान्थाङ–४ न्हेचुङस्थित सशस्त्र प्रहरी बोर्डर आउटपोस्टका इञ्चार्ज प्रहरी निरीक्षक प्रकाश धितालका अनुसार बिहीबार बिहानदेखि उपल्लो मुस्ताङको मौसम झन् प्रतिकूल बन्दै गएको छ । उच्च लेकमा हिमपात भए पनि दशगजा क्षेत्रमा आंशिक मात्र हिमपात भएको उनले बताए । जोखिमको पूर्वसूचना भएकाले चेकपोस्टबाट पर्यटक तथा सर्वसाधारणलाई नाका क्षेत्र नजान सुझाव दिइएको छ, तर आवागमन पूर्ण रूपमा बन्द गरिएको छैन ।
यसैबीच लोमान्थाङ गाउँपालिकाले बुधबार सार्वजनिक सूचना जारी गरी बिहीबारदेखि कोरला नाका तथा आसपासका क्षेत्रमा सवारी आवागमन नगर्न र सर्वसाधारणलाई त्यहाँ नजान आग्रह गरेको थियो । हिमपात, हिमआँधी र हिमपहिरोको जोखिमलाई ध्यानमा राखेर आजदेखि सीमापारी चीनतर्फको लिजी पोर्टमा रहेको नेपाली हाटबजार दुई दिनका लागि बन्द गरिएको छ ।
