नेपाल जेन-जी फ्रन्टले समाचार कक्षबाटै पत्रकार पक्राउ गरिएको घटनामा प्रधानमन्त्री बालेन्द्र शाह र गृहमन्त्री सुधन गुरुङले राजनीतिक तथा नैतिक जिम्मेवारी लिनुपर्ने माग गरेको छ। फ्रन्टले प्रहरी महानिरीक्षक दानबहादुर कार्कीमाथि छानबिन गर्न पनि माग राखेको छ।
शुक्रबार नेपाल प्रेसका पत्रकार विश्वमणि सुवेदी, डीएनखबरका धिरज बस्नेत र मोटिभेट न्युजका शोभराज बराललाई समाचार कक्षबाटै प्रहरीले नियन्त्रणमा लिएको थियो। सोही दिन नयाँ पत्रिका र दियो पोस्टका कार्यालयमा सादा पोशाकका प्रहरी पुगेर पत्रकारबारे सोधखोज गरेका थिए।
फ्रन्टका संयोजक रक्षा बमले जारी गरेको विज्ञप्तिमा पक्राउ पुर्जी नदेखाई र पक्राउको कारण नखुलाई समाचार कक्षमै प्रवेश गरेर पत्रकार नियन्त्रणमा लिएको घटनाको छानबिन माग गरिएको छ। विज्ञप्तिमा प्रधानमन्त्रीको सचिवालयले अनभिज्ञता दाबी गर्नुको सट्टा संलग्न प्रहरी अधिकारी र जिम्मेवार नेतृत्वमाथि छानबिन तथा कारबाही गर्नुपर्ने उल्लेख छ।
अभिव्यक्ति स्वतन्त्रता, पारदर्शिता र जवाफदेही शासनको मागसहित भएको जेन-जी विद्रोहबाट बनेको सरकारले नै समाचारका विषयमा पत्रकारमाथि धरपकड गर्नु विद्रोहको मर्म र जनादेशविपरीत भएको फ्रन्टको भनाइ छ।
फ्रन्टले समाचारको स्रोत पत्ता लगाउने वा अभिव्यक्ति नियन्त्रण गर्ने नाममा विद्युतीय कारोबार ऐनका असंवैधानिक दफा प्रयोग गर्न तत्काल रोक लगाउन र ती दफा खारेज गर्ने प्रक्रिया अघि बढाउन पनि माग गरेको छ। गृहमन्त्रीलाई संसद् र नागरिकप्रति जवाफदेही बनाउनुपर्ने मागसमेत विज्ञप्तिमा राखिएको छ। फ्रन्टले अभिव्यक्ति स्वतन्त्रता र संविधानको रक्षाका लागि निरन्तर खबरदारी गर्ने जनाएको छ।
