भारतको प्रमुख विपक्षी दल भारतीय राष्ट्रिय कंग्रेसका नेता राहुल गान्धीले गृहमन्त्री अमित शाहसँग जोडिएको आपराधिक मानहानि मुद्दामा सफाइ पाएका छन्। उत्तर प्रदेशको सुल्तानपुर जिल्ला अदालतले सोमबार उनलाई निर्दोष ठहर गरेको हो। सन् २०१८ मा सुरु भएको यो कानुनी प्रक्रिया आठ वर्षपछि टुंगिएको छ।

मुद्दाको पृष्ठभूमि २०१८ को कर्नाटक विधानसभा निर्वाचनसँग जोडिएको छ। त्यतिबेला गान्धीले तत्कालीन भाजपा अध्यक्ष शाहबारे दिएको भनिएको टिप्पणीका कारण उनीविरुद्ध मानहानिको आरोप लागेको थियो। स्थानीय भाजपा नेता विजय मिश्राले २०१८ अगस्टमा गान्धीविरुद्ध उजुरी दिएका थिए। गान्धीले शाहलाई एउटा हत्या मुद्दाका आरोपितका रूपमा चित्रित गरेको आरोप उजुरीमा थियो, जबकि शाहले उक्त मुद्दामा सन् २०१४ मै सफाइ पाइसकेका थिए।

गान्धी सन् २०२४ फेब्रुअरीमा सांसद तथा विधायकविरुद्धका मुद्दा हेर्ने विशेष अदालतमा उपस्थित भएका थिए र धरौटीमा छुटेका थिए। दुवै पक्षको बहस सकिएपछि अदालतले यसै महिनाको सुरुमा फैसला सुनाउने मिति सुरक्षित राखेको थियो।

गान्धीविरुद्ध प्रधानमन्त्री नरेन्द्र मोदी र भाजपा नेताहरूलाई लक्षित टिप्पणीका कारण भारतका विभिन्न अदालतमा मानहानि सम्बन्धी अन्य मुद्दा पनि चलिरहेका छन्। सन् २०१९ मा कर्नाटकको निर्वाचन प्रचारसभामा मोदी थर भएका नीरव मोदी र ललित मोदीको प्रसंग जोडेर गरेको टिप्पणीको मुद्दामा गुजरातको अदालतले सन् २०२३ मा उनलाई दोषी ठहर गर्दै दुई वर्षको कैद सजाय सुनाएको थियो। त्यसपछि उनको सांसद पद खारेज भएको थियो, तर सर्वोच्च अदालतले सजाय कार्यान्वयनमा रोक लगाएपछि उनी पुनः संसद् फर्किएका थिए। सन् २०२४ को निर्वाचनमा बुझाएको शपथपत्रमा उनले आफूविरुद्ध चलिरहेका अन्य आपराधिक मानहानि मुद्दाबारे पनि जानकारी दिएका थिए।