काठमाडौँ — कर्णाली प्रदेशका पहाडी तथा दुर्गम जिल्लामा हवाई सेवा सञ्चालनमा देखिँदै आएका समस्या र त्यसको दीर्घकालीन समाधानका विषयमा सरोकारवाला निकायबीच विस्तृत छलफल भएको छ।
संस्कृति, पर्यटन तथा नागरिक उड्डयनमन्त्री खडक राज पौडेल ‘गनेस’ को उपस्थितिमा बसेको बैठकमा कर्णाली प्रदेशका उद्योग, पर्यटन, वन तथा वातावरणमन्त्री, पर्यटन मन्त्रालयका सचिव तथा सहसचिव, नेपाल नागरिक उड्डयन प्राधिकरणका महानिर्देशक र दुर्गम क्षेत्रमा उडान भर्ने निजी वायुसेवा कम्पनीका सञ्चालकहरू सहभागी थिए।
बैठकमा कर्णालीका पहाडी जिल्लामा नियमित र सुरक्षित हवाई सेवा चलाउँदा आइपरेका व्यावहारिक तथा प्राविधिक कठिनाइको समीक्षा गरिएको थियो। सर्वसाधारणले हवाई सेवालाई सहज रूपमा प्रयोग गर्न सकून्, उडान नियमित र प्रभावकारी बनोस् र देखिएका अवरोध हटून् भन्ने विषयमा सहभागीहरूले आ-आफ्ना धारणा राखेका थिए।
सरकार र वायुसेवा सञ्चालकबीचको यो छलफलले कर्णालीको हवाई यातायातलाई अझ व्यवस्थित र भरपर्दो बनाउन सघाउ पुग्ने अपेक्षा गरिएको छ। दुर्गम बस्तीका बासिन्दाका लागि हवाई मार्ग नै छिटो र भरपर्दो सम्पर्कको माध्यम भएकाले यस क्षेत्रको सेवालाई प्राथमिकतामा राखेर अगाडि बढ्नुपर्नेमा बैठकमा जोड दिइएको थियो।
