प्रदेश सरकारमा सहकार्य गरिरहेका नेकपा (एमाले) र नेपाली कम्युनिस्ट पार्टी (नेकपा) बीच आगामी स्थानीय तह निर्वाचनपछि पार्टी एकतासम्म पुग्न सक्ने सम्भावना देखिएको छ। दुवै दल अहिले प्रदेशको सत्ता सहकार्यलाई निरन्तरता दिँदै स्थानीय निर्वाचनसम्म पुग्ने रणनीतिमा छन्। प्रदेश सहकार्य सफल भए र स्थानीय चुनावमा पनि सहकार्य टिकेको खण्डमा त्यसपछि एकताको चरणमा पुग्ने दुवै दलको तयारी रहेको नेताहरूले बताएका छन्।
पूर्वराष्ट्रपति विद्यादेवी भण्डारी सक्रिय राजनीतिमा फर्कनु पनि यही रणनीतिको अङ्गका रूपमा हेरिएको छ। कतिपयले भण्डारीको पुनरागमनलाई आगामी दिनमा पार्टी एकता गर्ने योजनासँग जोडेर विश्लेषण गर्न थालेका छन्। त्यस्तो अवस्थामा प्रचण्ड र ओलीले भण्डारीलाई अध्यक्ष मान्न तयार हुनुपर्ने अवस्था आउन सक्ने दुवै पक्षका नेता कार्यकर्ताहरूको बुझाइ छ।
यद्यपि, एमालेले तत्काल पार्टी एकता प्राथमिकतामा नरहेको स्पष्ट पारेको छ। एमाले सचिव तथा संगठन विभाग प्रमुख भानुभक्त ढकालका अनुसार अहिले सकारात्मक सम्बन्ध र कार्यगत एकतामार्फत सहकार्य अघि बढाउने नीति दुवै पार्टीको छ। प्रदेश सरकार निर्माणमा भइरहेको सहकार्यलाई स्थानीय तहसम्म विस्तार गर्दै वामपन्थी शक्तिबीचको एकतालाई व्यवहारबाट पुष्टि गर्ने प्रयास भइरहेको उनले बताए।
यसैबीच एमालेले आगामी मंसिर २ र ३ गते राष्ट्रिय भेला आयोजना गर्दैछ, जसमा तीन हजारभन्दा बढीको सहभागिता रहनेछ। पार्टीले सदस्यता नवीकरणलाई जोड दिँदै संगठन शुद्धीकरणलाई प्राथमिकता दिएको छ। एमालेको सदस्य संख्या साढे ६ लाख हाराहारी रहेको प्रचार विभाग प्रमुख निरज आचार्यले बताएका छन्। उता, नेकपाले कात्तिक ७ गते पेरिसडाँडाबाट दुईमहिने राष्ट्रिय जागरण अभियान थालेको छ, जसको लक्ष्य सदस्यता १५ लाख पुर्याउनु रहेको छ।
