राष्ट्रिय स्वतन्त्र पार्टीको मधेश संगठनभित्र गहिरो समस्या देखिएको अडिट समितिको प्रतिवेदनले औंल्याएको छ। सहमहामन्त्री हरि ढकालको संयोजकत्वमा बनेको समितिले मधेशका आठै जिल्लामा पुगेर स्थानीय नेता तथा कार्यकर्तासँग कुरा गरेपछि तयार पारेको प्रतिवेदन पार्टीमा बुझाएको हो। गत भदौमा गठन भएको समितिमा संगठन विभाग प्रमुख प्रमोद न्यौपाने, सहप्रवक्ता सुरेन्द्र चौधरी, अशोककुमार चौधरी, जगदीश खरेल र पुनम अग्रवाल सदस्य थिए। मधेशकै नेतालाई जिम्मा दिँदा वास्तविक अवस्था नआउने ठानेर अन्य प्रदेशका नेतालाई अध्ययनको जिम्मेवारी दिइएको पार्टीले जनाएको छ।
सदस्यता वितरण र प्रतिनिधि छनोटमा देखिएको विवादका कारण सात जिल्लामा अधिवेशन हुन सकेन। आठ जिल्लामध्ये पर्सामा मात्र अधिवेशन सम्पन्न भएको छ, भने बारा, रौतहट, सर्लाही, महोत्तरी, धनुषा, सिरहा र सप्तरीमा जिल्ला अधिवेशन नगरी केन्द्रीय महाधिवेशन गरिएको थियो। समितिका अनुसार पालिका र जिल्ला अधिवेशन नहुनुमा प्रदेश समिति र स्थानीय नेताहरू जिम्मेवार छन्। समिति सदस्य अग्रवालका अनुसार कुनै जिल्लामा मात्र नभई सबैतिर उस्तै प्रकृतिको विवाद छ, र पार्टी ठूलो हुँदै जाँदा सबैको अपेक्षा बढेको छ।
तल्लो तहका अधिवेशनका लागि पर्याप्त समय नदिई कार्यतालिका ल्याइएको, जातीय राजनीतिका प्रभाव, पुराना र नयाँ कार्यकर्ताबीचको टकराव तथा सदस्यता प्रणालीको कमजोरी पनि समस्याका कारणका रूपमा प्रतिवेदनमा उल्लेख छ। अग्रवालले पोर्टलमा बिहान रहेको नाम बेलुकासम्ममा फेरिने गरेको र अहिले शुल्कबिना जो कोहीले पनि अनलाइनबाट सदस्यता लिन पाउने अवस्थाले विवाद बढाएको बताएकी छन्। मधेश प्रदेश सभापति तपेश्वर यादवको भूमिकामाथि पनि पार्टीभित्र प्रश्न उठेको छ।
समितिले १० भन्दा बढी पालिकामा अधिवेशन विवादित रहेको र त्यस्ता ठाउँमा विवाद मिल्ने गरी नयाँ नेतृत्व छनोट गर्न सुझाव दिएको छ। मधेश अधिवेशन सम्पन्न गरेर मात्र स्थानीय चुनावमा जानु उपयुक्त हुने समितिको राय छ।
