सुनसरीको देवानगञ्ज गाउँपालिकाअन्तर्गत कप्तानगञ्जमा भएको घटनाका पीडित परिवारलाई न्याय दिन राष्ट्रिय प्रजातन्त्र पार्टीकी सांसद खुश्बु ओलीले सरकारको ध्यानाकर्षण गराएकी छन्। कप्तानगञ्ज पुगेर सहिद परिवार र घाइतेसँग भेट गरेपछि उनले बुधबार सामाजिक सञ्जालमार्फत आफ्नो धारणा सार्वजनिक गरेकी हुन्।
धार्मिक झण्डासम्बन्धी विवादपछि भएको घटनामा केही हिन्दू युवाको मृत्यु भएको र केही घाइते भएका ओलीले उल्लेख गरेकी छन्। घटनापछि सरकारले मृतकका परिवारलाई रोजगारीको अवसर दिने प्रतिबद्धता जनाए पनि तीन महिना बित्दा पनि त्यो कार्यान्वयन नभएको उनको भनाइ छ। आर्थिक सहायता मात्र दिएर राज्यको जिम्मेवारी पूरा नहुने र सहिद परिवारले परिचयपत्रसमेत पाउन नसकेको उनले दाबी गरेकी छन्।
ओलीले घटनाको छानबिनका लागि गठन भएको आयोगको प्रतिवेदन तत्काल सार्वजनिक गर्न, संलग्नको पहिचान गरी कानुनी कारबाही गर्न र पीडितसँग गरिएका प्रतिबद्धता पूरा गर्न माग गरेकी छन्। घाइतेका समस्या सम्बोधन गर्नुपर्ने र घटनासँग जोडिएर थुनामा रहेका युवाको हकमा पनि कानुनी प्रक्रियाअनुसार न्याय सुनिश्चित हुनुपर्ने उनको धारणा छ। पीडितका माग सम्बोधन नभए अवस्था थप जटिल बन्न सक्ने भन्दै उनले सरकारलाई गम्भीर भएर समस्या समाधान गर्न आग्रह गरेकी छन्।
भेटघाटमा हिन्दू सम्राट सेना नेपाल, सुनसरी हिन्दू समाज, संयुक्त हिन्दू मोर्चा, विश्व हिन्दू परिषद्, हिन्दू स्वयंसेवक सङ्घ र बजरंग दललगायतका संस्थाका प्रतिनिधि सहभागी थिए। ओलीले कुनै पनि समुदायले धार्मिक आस्थाका आधारमा अन्याय भोग्नु नहुने बताउँदै निष्पक्ष छानबिन र पीडितलाई न्यायबाट समाधान खोजिनुपर्नेमा जोड दिएकी छन्।
