काठमाडौँ । चाउचाउ र सुर्तीजन्य पदार्थका व्यवसायी कमलकिशोर मालपानीमाथि एकपछि अर्को गम्भीर प्रश्न उठेको छ। नागरिकता, राजस्व र वस्तुको गुणस्तरसम्बन्धी आरोपले उनी र उनका कम्पनीहरू छानबिनमा परेका छन्।
वाणिज्य, आपूर्ति तथा उपभोक्ता संरक्षण विभागले करेन्ट गुट्खा, भोला गुट्खा, भोला पावर खैनी र जीत खैनीमा तोकिएको तौल नपुगेको फेला पारेको थियो। त्यसपछि ललितपुरको पशुपति इन्टरनेश्नल बिजनेस प्रालिका ती उत्पादनको देशभर कारोबार रोक्न निर्देशन दिइयो। श्रीराम टोबाकोलाई तीन लाख रुपैयाँ जरिवाना पनि गरिएको थियो।
खाद्य प्रविधि तथा गुण नियन्त्रण विभागले यशोदा फुड्स प्रालिको १०० ग्रामको करेन्ट नुडल्स र ५० ग्रामको लाली चाउचाउ फिर्ता गर्न आदेश दिएको थियो। ती उत्पादनमा एक्सट्राक्टेड फ्याटको एसिड भ्यालु मापदण्डअनुसार नपाइएको थियो। सुनसरीको दुहबीस्थित एसियन बिस्कुट एण्ड कन्फेक्सनरी प्रालिको ज्याकन्याक क्रेकर्स बिस्कुट पनि फिर्ता गर्न निर्देशन दिइएको थियो।
मालपानीको नागरिकता पनि विवादमा छ। उनी २०१९ सालमा सप्तरीमा जन्मिएको विवरण छ। जन्मिएको ३५ वर्षपछि, २०५४ सालमा मात्र उनले जिल्ला प्रशासन कार्यालय सप्तरीबाट वंशजका आधारमा पहिलोपटक नागरिकता लिएका थिए (नं. ४८२०)। २०७१ सालमा उनले सोही नागरिकताको प्रतिलिपि रूपन्देहीबाट लिएका थिए। कानुनअनुसार सरकारी सेवामा नरहेका व्यक्तिले एउटा जिल्लाबाट जारी नागरिकताको प्रतिलिपि अर्को जिल्लाबाट लिन पाउँदैनन्। गृह मन्त्रालयमा उजुरी परे पनि प्रभावकारी छानबिन हुन सकेको छैन।
राजस्व अनुसन्धान विभागले गुट्खाको प्याकेटमा १.५ ग्राम बढी तौल भेटिएको आधारमा सात महिनाको उत्पादन गणना गरी करिब १० करोड ३२ लाख २६ हजार ३७६ रुपैयाँ बिगो कायम गरेर मुद्दा दायर गरेको थियो। २०७५ साल माघमा रूपन्देही र कपिलवस्तुका पसलमा छापा मार्दा श्रीराम टोबाकोका उत्पादनमा अन्तःशुल्क स्टिकर नटाँसिएको फेला परेको थियो। निरीक्षणमा स्टिकर मौज्दात कम र तौलमा गडबडी देखिएपछि विभागले रूपन्देही जिल्ला अदालतमा मुद्दा दायर गरेको थियो।
