लुम्बिनी प्रदेशसभा सदस्य अम्बिका काफ्लेले आफूलाई पदबाट हटाउन प्रयोग गरिएको पत्र कीर्ते भएको आरोप लगाउँदै अदालतमा उजुरी दिएकी छन्। जनता समाजवादी पार्टी नेपालकी सदस्य काफ्लेले मंगलबार दाङ जिल्ला अदालतमा फिराद दर्ता गराएकी हुन्। फिरादमा प्रदेशसभाका सभामुख तुलाराम घर्ती मगरसहित पाँच जनालाई विपक्षी बनाइएको छ।
विपक्षीहरूमा सभामुख घर्ती मगरसँगै प्रदेशसभा सचिव दुर्लभकुमार पुन मगर, प्रवक्ता लोकमणि पाण्डे, जसपा नेपालका प्रदेशसभा सदस्य भनिएका सन्तोष पाण्डे र लेटरहेड प्रयोगको आरोप लागेका अजयकुमार झा छन्। काफ्लेको दाबी छ, उक्त पत्र पार्टीको कुनै आधिकारिक निर्णय वा अख्तियारीबिना तयार पारिएको थियो। उनले दल नत्यागेको, अर्को दलमा नगएको र राजीनामा नदिएको बताउँदै अनधिकृत पत्रकै भरमा आफूलाई पदमुक्त गरिएको आरोप लगाएकी छन्।
यसअघि मुख्यमन्त्रीलाई विश्वासको मत दिने विषयमा पार्टीको निर्देशन नमानेको आरोपमा काफ्लेमाथि कारबाही थालिएको थियो। संसदीय दलका नेता सन्तोषकुमार पाण्डेको सिफारिसपछि सचिवालयले उनको पद रिक्त भएको सूचना निकालेको थियो। सो निर्णयविरुद्ध सर्वोच्च अदालत पुगेकी काफ्लेको पक्षमा अदालतले २०८३ साल असोज ६ गते निर्णय कार्यान्वयन नगर्न अन्तरिम आदेश दिएको थियो।
काफ्लेका अनुसार विवादित पत्र भाद्र २२ गते सचिवालयमा दर्ता भएको थियो र त्यसकै आधारमा भदौ २४ गते पदमुक्तिको सूचना जारी गरिएको थियो। पत्रमा जसपा नेपालको नाम, लेटरहेड, छाप र पदाधिकारीको अख्तियारी दुरुपयोग भएको उनको आरोप छ। उनले मुलुकी अपराध संहिता, २०७४ को दफा २७६ र २७७ लगायतका व्यवस्थाअनुसार कारबाहीको माग गरेकी छन्। फिरादमा विवादित पत्रको सक्कल प्रति, दर्ता तथा चलानी किताब र निर्णय परीक्षण गर्नुपर्ने, लेटरहेड, छाप र हस्ताक्षरका नमुना जाँचेर संलग्न व्यक्तिको भूमिका पहिचान गर्नुपर्ने माग गरिएको छ। उनले लिखतलाई कीर्ते ठहर गरी अमान्य बनाउन र भोगेको क्षतिका लागि कानुनी उपचार दिन पनि आग्रह गरेकी छन्।
