वासिङ्टन — अमेरिकी राष्ट्रपति डोनाल्ड ट्रम्पले इरानविरुद्ध गरिएको सैन्य आक्रमणले त्यो देशको आणविक क्षमता पूरै समाप्त पारेको दाबी गरेका छन्। इरानलाई आणविक हतियार बनाउन वा चलाउन दिनु विश्वकै लागि ठूलो खतरा हुने भएकाले त्यसलाई रोक्न अग्रिम सैन्य कदम चाल्नुपरेको उनको तर्क छ।
मिचिगनमा हुने चुनावी सभाअघि फक्स २ टेलिभिजनसँग कुरा गर्दै ट्रम्पले इरानसँग आणविक हतियार भए त्यसको प्रयोग हुने सम्भावना रहेको बताए। आणविक टकरावबाट हुन सक्ने जनधनको क्षति छेक्न आफूले समयमै कारबाही गरेको उनको भनाइ थियो। आक्रमणको नतिजा आफ्नो अपेक्षाभन्दा पनि राम्रो रहेको दाबी उनले गरे।
विश्व ऊर्जा बजारमा अस्थिरता बढिरहेका बेला ट्रम्पले रणनीतिक रूपमा महत्त्वपूर्ण हर्मुज जलसन्धिबाट हुने तेल ढुवानी युद्धअघिको तुलनामा बढेको बताए। त्यसको श्रेय उनले अमेरिकी नौसेनाको नाकाबन्दी र सैन्य सामर्थ्यलाई दिए। युद्धका कारण तेलको भाउ केही उकालो लाग्ने अनुमान आफूलाई पहिल्यै भएको उल्लेख गर्दै उनले जलसन्धिबाट अहिले बाहिरिने तेलको परिमाण युद्धपूर्वको भन्दा बढी रहेको दाबी गरे। नौसेनाको सक्रियताले तेल आवागमन निरन्तर राख्न सघाएको उनको भनाइ थियो।
अर्कोतर्फ इरानका विदेशमन्त्री अब्बास अराघचीले इरानविरुद्ध थप सैन्य कारबाही गर्नु तर्कसंगत नहुने बताएका छन्। अर्को युद्ध भए पनि इरानको नीतिमा कुनै परिवर्तन नआउने उनले स्पष्ट पारे। इरानी समाचार संस्था आइएसएनएका अनुसार विदेश नीतिमा सहमति जुटाउन सैयद कमल खर्राजीको भूमिकासम्बन्धी कार्यक्रम तथा खर्राजी दस्तावेज केन्द्र, सङ्ग्रहालय र विदेश मन्त्रालयको विशेष पुस्तकालय उद्घाटनका क्रममा अराघचीले यस्तो धारणा राखेका हुन्। उनले युद्धको चर्चा फेरि चले पनि इरानका नीति यथावत् रहने बताए।
