बंगालको खाडीमा बनेको चक्रवात अर्नब बुधबार बिहान भारतको आन्ध्र प्रदेश तटमा प्रवेश गर्ने अनुमान गरिएको छ। चक्रवात बापटला र विशाखापत्तनमबीचको तटीय क्षेत्रमा पुग्दा अत्यन्त गम्भीर अवस्थामा रहनेछ। त्यसबेला हावाको गति प्रतिघण्टा ११५ देखि १२५ किलोमिटरसम्म पुग्नेछ र बढेर १४० किलोमिटर प्रतिघण्टासम्म पुग्न सक्नेछ।
चक्रवातको असर हिमालदेखि तराईसम्म पर्न सक्ने भएकाले सरकारले बिहीबारदेखि शनिबारसम्म सुरक्षा निकायलाई उच्च सतर्क अवस्थामा रहन निर्देशन दिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीले सम्बन्धित निकायलाई पूर्वतयारीसहित रहन भनिएको बताए।
भारतमा चक्रवातका कारण अक्टोबर २७ र २८ मा चल्ने ५३ वटा रेल सेवा रद्द भएका छन्। विशाखापटनम र विजयवाडा आउने-जाने उडान प्रभावित हुन सक्ने भन्दै एयर इन्डियाले यात्रुलाई उडानको अवस्था जाँचेर मात्र विमानस्थल जान भनेको छ। प्रभावित क्षेत्रमा विद्यालय बन्द गरिएको छ।
नेपालमा बुधबार कोशी, मधेश, बागमती र लुम्बिनी प्रदेशमा बादल लाग्नेछ। बिहीबारदेखि भने वर्षा र हिमपात सुरु हुने अनुमान छ। शुक्रबार र शनिबार कोशीदेखि सुदूरपश्चिमसम्म वर्षा र हिमपात बढ्नेछ भने केही स्थानमा भारी वर्षा वा हिमपात हुन सक्नेछ। वरिष्ठ मौसमविद् विभूति पोखरेलले अहिले नै आत्तिनुपर्ने अवस्था नरहेको तर सतर्क रहनुपर्ने बताइन्।
अध्यागमन विभागले कात्तिक १२, १३ र १४ गते पदयात्रा बन्द गरेको छ। प्राधिकरणले पर्यटक र पदयात्रीलाई उच्च पहाडी तथा हिमाली क्षेत्रमा यात्रा नगर्न र पहिले नै गएकालाई सुरक्षित स्थानमा बस्न आग्रह गरेको छ। विपद्का बेला १२३४, नेपाल प्रहरीको १००, सशस्त्र प्रहरी बलको १११४ र पर्यटक प्रहरीको ११४४ मा सम्पर्क गर्न सकिनेछ। मौसमसम्बन्धी जानकारीका लागि ११५५ मा फोन गर्न सकिनेछ।
