इरानका विदेशमन्त्री अब्बास अराघचीले सैन्य आक्रमण वा प्रतिबन्ध थप्दैमा युद्ध अन्त्य नहुने बताएका छन्। युद्ध रोक्न सम्मानको भाषा प्रयोग गर्नुपर्ने उनको भनाइ छ।
इरानको सरकारी समाचार संस्था इरनालाई दिएको अन्तर्वार्तामा अराघचीले अमेरिकालाई इरानका माग र सर्त पूरा गर्न आग्रह गरे। इरानले प्रस्तुत गरेको दुईदिने योजनामा समावेश सर्तहरू अझै पनि वार्ताका लागि खुला रहेको उनले बताए।
अमेरिकी राष्ट्रपति डोनाल्ड ट्रम्पले इरानसँगको युद्धमा आफ्नो कुनै पनि उद्देश्य हासिल नगरेको र हासिल गर्न पनि नसक्ने कुरा धेरैअघि नै बुझ्नुपर्ने अराघचीको भनाइ छ।
अमेरिकाको मध्यावधि निर्वाचनमा ट्रम्पको दलले बेहोरेको पराजयको प्रसंग उल्लेख गर्दै उनले अमेरिकी जनताले इरानसँगको युद्धको विरोध गरेको बताए। इजरायलको समर्थनमा अमेरिकालाई निरन्तर युद्धमा सहभागी गराउन नचाहेको सन्देश ट्रम्पले बुझ्नुपर्ने उनको भनाइ छ।
प्रतिबन्ध र आर्थिक दबाबको बाटो गलत भएको महसुस गर्न ट्रम्पलाई धेरै समय नलाग्ने टिप्पणी पनि अराघचीले गरे। इरानसँगको तनाव र सम्भावित सैन्य कारबाहीबारे अन्तर्राष्ट्रिय चासो बढिरहेका बेला इरानी विदेशमन्त्रीको यो भनाइ आएको हो।
