तिहारको समयमा जुवातासविरुद्ध देशभर चलेको कारबाहीमा प्रहरीले एकै पटक ११० जनालाई नियन्त्रणमा लिएको छ। काठमाडौंदेखि झापा, चितवन, धनकुटा, भक्तपुर, धनुषा, कपिलवस्तु, सर्लाही, कञ्चनपुर र कास्कीसम्म फैलिएको छापामा उनीहरू तास र कौडा खेलिरहेको अवस्थामा भेटिएका हुन्।
काठमाडौंको बूढानीलकण्ठ नगरपालिका–६, टनागाउँमा सोमबार दिउँसो छापा मार्दा राजेश नगरकोटीसहित १० जना पक्राउ परे। उनीहरूबाट ५६ हजार ५ सय ४० रुपैयाँ नगद र ६ बुक तास बरामद भएको प्रहरीले जनाएको छ।
चितवनमा मात्र चार ठाउँबाट १७ जना समातिए। रत्ननगरको हात्तीगाडेमा कौडा खेलिरहेका माधव थापा मगरसहित ६ जना र भरतपुर–७ मा डिलाराम चालिसेको घरबाट ७ जना पक्राउ परे। चालिसेको घरबाट ३ लाख ३७ हजार ४ सय ८० रुपैयाँ नगद फेला परेको छ, जुन यस पटकको कारबाहीमा बरामद भएको सबैभन्दा ठूलो रकम हो।
धनकुटाको पाख्रीबासमा विष्णु घिसिङसहित ७ जना, भक्तपुरको मध्यपुर थिमि र चाँगुनारायणमा गरी २४ जना, झापाको कमल र दमकमा २२ जना पक्राउ परे। त्यस्तै जनकपुरधाममा ५, कपिलवस्तुको वाणगंगामा ४, सर्लाहीको बरहथवा र लालबन्दीमा ११, कञ्चनपुरको भीमदत्तमा ६ र पोखरामा ६ जना समातिए।
पक्राउ परेकाहरूबाट लाखौं रुपैयाँ नगद, दर्जनौं बुक तास र ठूलो संख्यामा कौडा बरामद भएको छ। चाडपर्वको बेला जुवा खेल्ने प्रवृत्ति बढ्ने भएकाले प्रहरीले निगरानी कडा पारेको जनाएको छ। पक्राउ परेका सबैमाथि आवश्यक अनुसन्धान भइरहेको प्रहरीले बताएको छ।
