नेकपा एमालेका अध्यक्ष केपी शर्मा ओलीले नेपाली समाजमा आफ्नै देशका विद्वानलाई उचित सम्मान दिने संस्कार कमजोर रहेको बताएका छन्। मंगलबार काठमाडौँमा मदन भण्डारी स्मृति प्रतिष्ठान नेपालले प्रकाशन गरेको स्मारिका सार्वजनिक गर्ने कार्यक्रममा बोल्दै उनले स्वदेशी ज्ञानी व्यक्तिको योगदानलाई धेरैले चिन्न नसकेको वा चिनेर पनि स्वीकार गर्न नचाहेको टिप्पणी गरे। उनले नेपालीहरूले आफ्ना विद्वानलाई विद्वान नै नठान्ने गरेको बताए।
ओलीका अनुसार स्वदेशी लेखकले जतिसुकै प्रमाणसहित र तर्कपूर्ण रूपमा लेखे पनि आफ्ना पुस्तकमा उनीहरूले विदेशी लेखककै भनाइलाई बढी स्थान दिने गर्छन्। आफ्नै मुलुकका विद्वानको विचारलाई उद्धृत गर्ने अभ्यास कम हुँदै गएको र विदेशी विद्वानकै उदाहरण दिने परिपाटी बढी रहेको उनको भनाइ थियो।
उनले भाषा, संस्कृति, कला र वाणीमा डुबेको मानिस समाजका लागि राम्रो र मानवीय स्वभावको हुने धारणा राखे। ज्ञान मात्रै पर्याप्त नहुने उल्लेख गर्दै उनले धेरै जानेका व्यक्तिमा पनि असल आचरण र मानवता नभए त्यस्ता व्यक्ति समाज र छिमेकका लागि पीडादायक बन्ने बताए।
ओलीले ज्ञान भएर मात्र नपुग्ने, त्यससँगै मानवीय व्यवहार पनि उत्तिकै जरुरी हुने धारणा व्यक्त गरे।
