हिमाली क्षेत्रमा मौसम झन् खराब हुने चेतावनी आएपछि सरकारले तीन दिनका लागि पदयात्रा स्थगित गर्न भनेको छ। गृह मन्त्रालय मातहतको अध्यागमन विभागले मंगलबार जरुरी सूचना निकालेर कात्तिक १२, १३ र १४ गते उच्च पहाडी तथा हिमाली भेगमा पदयात्रा नगर्न र नगराउन सबैलाई अनुरोध गरेको हो।
विभागले राष्ट्रिय विपद् जोखिम न्यूनीकरण तथा व्यवस्थापन प्राधिकरणले दिएको चेतावनीका आधारमा यो आग्रह गरेको जनाएको छ। ती दिनमा भारी हिमपातसँगै हिमआँधी चल्ने र हिमपहिरो खस्ने सम्भावना उच्च रहेको प्राधिकरणको आकलन छ। यस्तो अवस्थामा पदयात्रामा निस्कनु ज्यानका लागि नै खतरनाक हुन सक्ने विभागको भनाइ छ।
सूचनामा पहिले नै यात्रामा निस्किसकेका पर्यटकलाई ती दिनभर सुरक्षित स्थानमै बस्न भनिएको छ। विभागका निर्देशक सूर्यप्रसाद चापागाईँले जारी गरेको सूचनाअनुसार ती मितिमा उच्च पहाडी तथा हिमाली क्षेत्रतर्फ कोही पनि नजान आग्रह गरिएको छ।
मौसम प्रतिकूल रहेकाले निषेधित क्षेत्रमा जाने पदयात्राका लागि दिइने अनुमति पनि मंगलबारदेखि नै ती दिनका लागि रोकिएको छ। विभागले ट्रेकिङ कम्पनी, पदयात्री, पथप्रदर्शकलगायत सबै सरोकारवालालाई मौसमको जोखिम बुझेर सूचनाको पूर्ण पालना गर्न र सुरक्षित रहन अपिल गरेको छ।
