जनकपुरधाममा जिल्ला प्रहरी प्रमुखमाथि लगाइएको आरोपलाई लिएर विवाद बढेको छ। राष्ट्रिय स्वतन्त्र पार्टीका धनुषा सभापति लक्ष्मेश्वर यादवले प्रहरी उपरीक्षक रूपेश खड्कामाथि घुसखोरी र दलालीको आरोप लगाएपछि प्रहरीले त्यसको खण्डन गरेको छ।
गत आइतबार हंसपुर नगरपालिकामा आयोजित शुभकामना आदानप्रदान कार्यक्रममा यादवले जिल्ला प्रहरी कार्यालयको कार्यशैलीमाथि प्रश्न उठाए। उनले सामान्य झगडाका घटनामा पनि आर्थिक लेनदेन गरेर मुद्दा दर्ता हुने गरेको दाबी गरे। आफूले प्रत्यक्ष नदेखे पनि दर्जनौँ व्यक्तिले आफूलाई गुनासो गरेको उनले बताए।
प्रहरी उपरीक्षक खड्काले मंगलबार विज्ञप्ति जारी गर्दै आरोपको खण्डन गरे। विज्ञप्तिमा यादवले गत भदौ १७ गते छोरी हराएको भन्दै जिल्ला प्रहरी कार्यालयमा निवेदन दिएको उल्लेख छ। अनुसन्धानमा ती महिला हराएको नभई काठमाडौँ जिल्ला अदालतबाट विवाहको नाता कायम गराएर पतिसँग गएको खुलेको प्रहरीको भनाइ छ। वैशाख ८ गते नाता कायम भएको र भदौ १४ गते महिला पतिसँग गएको खड्काले बताए। प्रहरीले दुवै पक्षबीच कुराकानी गराएर विवाहको प्रमाण देखाएको उनको दाबी छ।
यादवले सम्बन्धित व्यक्तिलाई पक्राउ गरेर छुटाइदिन दबाब दिएको खड्काको जिकिर छ। त्यसो नगरे हजारौँ मानिस ल्याएर जिल्ला प्रहरी कार्यालय घेराउ गर्ने धम्कीसमेत दिएको विज्ञप्तिमा उल्लेख छ।
खड्काले आरोप भ्रामक, कपोलकल्पित र अपमानजनक भएको बताएका छन्। कानुनविपरीत काम गर्न अस्वीकार गरेपछि प्रतिशोध साँधेर आरोप लगाइएको उनको दाबी छ। उनले आरोप पुष्टि गर्न चुनौती दिँदै प्रचलित कानुनअनुसार अघि बढ्ने बताएका छन्।
प्रहरी प्रवक्ता एवं प्रहरी नायब उपरीक्षक ओमप्रकाश खनालले घुस लिएको भए त्यसको प्रमाण गृह मन्त्रालयमा पेस गर्न आग्रह गरेका छन्। जिल्ला सरकारी वकिल कार्यालयसँग परामर्श गरेर कानुनी उपचार थालिने उनले बताए।
