अमेरिकी राष्ट्रपति डोनाल्ड ट्रम्पले अमेरिका र इरानबीच वार्ता जारी रहेको दाबी गर्दै अमेरिकी सेनाले इरानको हवाई प्रतिरक्षा उपकरण नष्ट गरेको बताएका छन्। ह्वाइट हाउसबाट बाहिरिने क्रममा पत्रकारसँग कुरा गर्दै ट्रम्पले इरानसँग वार्ता भइरहेको र यसअघि पनि छलफल भएको बताएका हुन्।
ट्रम्पले आफूहरूले इरानलाई पराजित गरिसकेको र इरानको मामिलामा अवस्था आफूहरूका लागि निकै राम्रो रहेको दाबी गरे। इरानसँग कुरा गरिरहेको र यसअघि पनि वार्ता गरिसकेको उनले बताए।
ट्रम्पले होर्मुज जलडमरूमध्य खुल्दै गएको र त्यहाँबाट पहिलेभन्दा बढी तेल व्यापार भइरहेको दाबीसमेत गरेका छन्। पछिल्लो ६–७ महिनामा अमेरिकाले कुनै पनि सैनिक गुमाउनुपरेको छैन भन्ने दाबी पनि उनले गरेका छन्।
अर्को प्रसङ्गमा ट्रम्पले इरानले विकास गरेको एउटा सानो हवाई प्रतिरक्षा उपकरण अमेरिकी सेनाले नष्ट गरेको बताएका छन्। यद्यपि उक्त कारबाही कहाँ र कहिले गरिएको हो भन्नेबारे उनले खुलाएका छैनन्।
उता, ट्रम्पको यो भनाइ सार्वजनिक भइरहेका बेला इरानी सञ्चारमाध्यमले भने देशको दक्षिणी क्षेत्रमा विभिन्न स्थानमा क्षेप्यास्त्र आक्रमण भएको समाचार सार्वजनिक गरेका थिए। इरानी समाचार संस्था इरना र तस्निमका अनुसार कश्म टापुमा दुईवटा क्षेप्यास्त्र खसेका थिए। त्यस्तै इरानी प्रसारण संस्थाले सिरिक क्षेत्रमा खानेपानीका दुईवटा ट्याङ्कीलाई निशाना बनाइएको जनाएको छ। आक्रमणपछि उक्त क्षेत्रका केही स्थानमा खानेपानी आपूर्ति अवरुद्ध भएको समाचारमा उल्लेख छ।
