सन् २०२५ को फेब्रुअरी २८ को बिहान पाकिस्तानको बलुचिस्तान प्रान्तको लसबेला जिल्लास्थित ओथल क्षेत्रमा रहेको नेसनल बैंक अफ पाकिस्तानमा एउटा गाडी आइपुग्यो। गाडीबाट सुरक्षा बलको पोसाक लगाएका केही हतियारधारी व्यक्ति ओर्लिए र बैंकभित्र छिरे। उनीहरूले आफूहरू एउटा कारोबारको जाँच गर्न आएको बताएपछि कर्मचारीले शंका गरेनन् र ब्रान्च म्यानेजरलाई बोलाइदिए।
केही बेरमै ती व्यक्तिले बैंकका कर्मचारी र सुरक्षाकर्मीलाई नियन्त्रणमा लिए। प्रतिरोध गर्न खोज्ने कर्मचारीलाई राइफलको कुन्दाले हिर्काए र सुरक्षाकर्मीको जी–३ राइफल खोसे। त्यसपछि उनीहरू नगद राखिएको ठाउँमा पुगे र त्यहाँ रहेको २० करोड २० लाख पाकिस्तानी रुपैयाँ ६ वटा बोरामा भरे। नोटले भरिएका बोरा गाडीको डिक्कीमा राखेर कर्मचारीलाई भल्टभित्र थुनेर उनीहरू फरार भए।
सूचना पाएर घटनास्थल पुगेका तत्कालीन प्रहरी चौकी प्रमुख यार मोहम्मदले लुटेराहरू पुरानो मोडलको गाडीमा आरसिडी राजमार्ग हुँदै बलुच गोठतर्फ गएको थाहा पाए। प्रहरीले पछ्याउन थालेपछि लुटेराहरूले गोली चलाए। यार मोहम्मदलाई खुट्टामा र आँखानजिक गरी दुई गोली लाग्यो र उक्त घटनामा उनले एउटा आँखाको ज्योति गुमाए। लुटेराहरू पहाडी क्षेत्रतर्फ भाग्नुअघि गाडीमा आगो लगाए र दुईवटा हतियारसमेत जलाए। अनुसन्धानमा संलग्न अधिकारीका अनुसार औँठाछाप र अन्य फरेन्सिक प्रमाण मेटाउनकै लागि गाडी जलाइएको थियो।
घटनाको डेढ वर्षसम्म अभियुक्तको पहिचान हुन सकेन। तर मुख्य अभियुक्तको बैंक खातामा भएको अस्वाभाविक कारोबारले अनुसन्धानलाई नयाँ दिशा दियो। लुटपाटअघि केही हजारको मात्र कारोबार हुने खातामा घटनापछि करोडौँ रुपैयाँको कारोबार हुन थाल्यो र पछिल्लो डेढ वर्षमा १७ करोड पाकिस्तानी रुपैयाँ बराबरको रकम ओहोरदोहोर भएको पत्ता लाग्यो।
अनुसन्धानमा गिरोहमा संलग्न पाँच जना लसबेला युनिभर्सिटी अफ मरीन साइन्सेजका वर्तमान तथा पूर्वविद्यार्थी भएको खुल्यो। उनीहरू २५ देखि २६ वर्ष उमेर समूहका छन्। मुख्य योजनाकार विश्वविद्यालयमै अध्ययनरत छन् भने एक जनाले यसअघि तुरबतस्थित एउटा बैंकमा काम गरिसकेका थिए। उनीहरूले सुरक्षा बलको पोसाक सन् २०२४ को डिसेम्बरमै अनलाइनमार्फत मगाएका थिए।
प्रहरीले मुख्य अभियुक्तसहित तीन जनालाई पक्राउ गरेको छ भने अन्यको खोजी भइरहेको छ। लुटिएको रकममध्ये करिब दुई करोड ७५ लाख पाकिस्तानी रुपैयाँ स्थानीय एक व्यवसायीको बैंक खाताबाट कारोबार भएको र ती व्यवसायीले कारोबार स्वीकार गरी मजिस्ट्रेटसमक्ष बयान दिएको अनुसन्धान अधिकारीले बताएका छन्। लुटिएको रकमबाट चार करोड पाकिस्तानी रुपैयाँभन्दा बढी मूल्यका गाडी र अन्य सामग्री खरिद गरिएको छ भने केही सामान बरामद भइसकेको छ। पक्राउ परेका अभियुक्तलाई १४ दिन प्रहरी हिरासतमा राखेर अनुसन्धान गरेपछि न्यायिक हिरासतमा पठाइएको छ र उनीहरूका मोबाइल फोन फरेन्सिक परीक्षणका लागि पन्जाबस्थित प्रयोगशालामा पठाइएको छ।
