बेइजिङ । चीनले अमेरिकाबाट भित्रिने सामानमा लगाउँदै आएको २४ प्रतिशत अतिरिक्त भन्सार शुल्कको निलम्बन थप दुई महिनाका लागि लम्ब्याउने भएको छ । राज्य परिषद्को भन्सार शुल्क आयोगले सोमबार सार्वजनिक गरेको जानकारीअनुसार यो व्यवस्था नोभेम्बर १० देखि कार्यान्वयनमा आउनेछ ।
तर, अमेरिकी वस्तुमा लगाइएको १० प्रतिशत अतिरिक्त शुल्क भने यथावत् रहनेछ । आयोगका अनुसार यो निर्णय वासिङटनमा दुवै मुलुकका राष्ट्रप्रमुखबीच भएको भेटवार्ताबाट निस्केको सहमतिलाई व्यवहारमा उतार्ने क्रममा लिइएको हो ।
आयोगले जारी गरेको विज्ञप्तिमा चीनको भन्सार कानुन, भन्सार ऐन तथा वैदेशिक व्यापार कानुनसँगै अन्तर्राष्ट्रिय कानुनका आधारभूत मान्यताअनुसार सन् २०२५ को घोषणा नम्बर ४ मा उल्लेख भएका अतिरिक्त भन्सारसम्बन्धी व्यवस्थामा परिमार्जन गरिएको उल्लेख छ ।
अमेरिकी पक्षले अन्तर्राष्ट्रिय आपतकालीन आर्थिक शक्ति ऐनअन्तर्गतका भन्सार शुल्कलाई धारा ३०१ का शुल्कले विस्थापन गर्ने योजना रहेको जानकारी गराएको आयोगले जनाएको छ । चीनले अमेरिकी पक्षका आगामी कदमलाई नजिकबाट नियाल्ने र परिस्थितिअनुसार आफ्ना जवाफी भन्सार उपायमा परिमार्जन गर्ने बताएको छ ।
आंशिक निलम्बनलाई निरन्तरता दिनुले दुवै मुलुकका व्यवसायबीचको सहकार्यका लागि तुलनात्मक रूपमा स्थिर र अनुमान गर्न सकिने नीतिगत वातावरण बनाउने र चीन–अमेरिका आर्थिक तथा व्यापारिक सम्बन्धको दीर्घकालीन र स्थायी विकासमा सहयोग पुग्ने आयोगको भनाइ छ ।
