काठमाडौं । नेपालीहरूको दोस्रो ठूलो चाड तिहारमा यस वर्ष नेपाली फूलले बजार पाएको छ । स्वदेशी उत्पादनले नै बजारको माग धान्ने र यसपालिको तिहारमा करिब ५० करोड रुपैयाँ बराबरको फूलको कारोबार हुने अनुमान गरिएको छ ।
फ्लोरिकल्चर एशोसिएसन नेपालका अध्यक्ष राजेशभक्त श्रेष्ठका अनुसार यस वर्षको तिहारमा देशभर फूलको व्यापार निकै राम्रो हुने देखिएको छ । बजारको अवस्था, किसानको उत्पादन र माग विश्लेषण गर्दा करिब ५० करोड रुपैयाँको कारोबार हुने अनुमान गरिएको हो । यो आँकडा अझै बढ्न सक्ने सम्भावना रहेको उनले बताए ।
यस वर्ष तिहारमा देशभर करिब ४५ लाखदेखि ५० लाख वटा सयपत्री फूलको माला खपत हुने अनुमान छ । यो सम्पूर्ण माग नेपाली उत्पादनले नै धान्नेछ । भाइटीकामा विशेष महत्त्व राख्ने मखमली फूलको मालाको माग करिब दुई लाख वटा रहने अनुमान छ । मखमली फूलमा नेपाल धेरै अघिदेखि नै आत्मनिर्भर छ र मागभन्दा बढी उत्पादन भएकाले अष्ट्रेलिया, अमेरिका र युरोपमा रहेका नेपालीका लागि निर्यात समेत भइरहेको छ ।
नेपाली फूलले बजार पाउनुमा सिमानामा गरिएको कडाइको ठूलो भूमिका छ । सशस्त्र प्रहरी बलले विगत दुई सातादेखि सिमानामा फूल आयातमा कडाइ गर्दै अवैध रूपमा भित्र्याउन खोजिएका फूल र प्लास्टिकका कृत्रिम माला जफत गरेर नष्ट गर्दै आएको छ । जिल्ला प्रशासन कार्यालयहरूले पनि झापादेखि पश्चिमसम्मका नाकामा कडा निगरानी गर्न निर्देशन दिएका छन् ।
स्थानीय तहको सहयोग पनि यसमा थपिएको छ । काठमाडौं महानगरपालिकालगायत धेरै स्थानीय तहले विदेशी फूल र प्लास्टिकका मालाको बिक्रीमा रोक लगाएका छन् भने महानगरले किसानलाई फूल बेच्न ३० भन्दा बढी निश्चित स्थान तोकिदिएको छ । भृकुटीमण्डप, तीनकुने र बालाजुलगायतका स्थानमा निःशुल्क ठाउँ उपलब्ध गराइएपछि किसानले बिचौलियाको मार खेप्नु परेको छैन ।
