नेपाली कांग्रेसका नेता प्रकाशमान सिंहले १४औँ महाधिवेशनबाट निर्वाचित शेरबहादुर देउवा नै पार्टीको आधिकारिक सभापति रहेको दाबी गरेका छन्। देउवा समूहले शनिबार काठमाडौंमा आयोजना गरेको जिल्ला अधिवेशनको उद्घाटन समारोहमा बोल्दै उनले देउवाले राजीनामा नदिएको अवस्थामा विशेष महाधिवेशनबाट नयाँ नेतृत्व छान्ने वा कार्यसमिति भङ्ग गर्ने अधिकार कसैलाई नभएको बताए।
उनले पार्टीको परम्परा र विधानअनुसार नै आफूहरू अघि बढिरहेको उल्लेख गर्दै विशेष महाधिवेशन आयोजना गर्नेहरूले निर्वाचित सभापति र कार्यसमितिलाई हटाउने अधिकार कहाँबाट पाए भन्दै प्रश्न गरे। विधि र प्रक्रिया मिचेर हुने काममा साथ दिने प्रवृत्तिको आलोचना गर्दै उनले त्यस्ता कामको मूल्यांकन समाज र इतिहासले गर्ने बताए। राजनीतिक स्वार्थका लागि गलत काममा सहमति जनाउनु उचित नहुने उनको भनाइ थियो।
पूर्वमहामन्त्री सिंहले कांग्रेसको विधान र राजनीतिक दलसम्बन्धी कानुनको प्रक्रिया पूरा नगरी निर्वाचन आयोगले एकतर्फी रूपमा गरेको निर्णय आफूहरूलाई मान्य नभएको स्पष्ट पारे। आयोग पूर्वाग्रही रहेको आरोप लगाउँदै उनले आयोगले गराउने निर्वाचनमा सहभागी हुन नहुने सुझाव आफूले देउवालाई दिएको पनि बताए।
