मंगलबार सुडानको दक्षिणपूर्वी क्षेत्रमा रहेको ब्लु नाइल राज्यमा भएको ड्रोन आक्रमणले नौ जना विस्थापित नागरिकको ज्यान लिएको छ भने केही अरू घाइते भएका छन्।
पीडितहरू कुर्मुकको बानी शाको गाउँबाट ब्लु नाइलको राजधानी दमाजिन जाँदै थिए। स्थानीय अधिकारीहरूका अनुसार यात्रा गरिरहेकै बेला उनीहरूमाथि ड्रोनले आक्रमण गर्यो।
कुर्मुकका आयुक्त अब्देल अती मोहम्मद अल-फाकीले यस आक्रमणको आरोप अर्धसैनिक समूह र्यापिड सपोर्ट फोर्सेसमाथि लगाएका छन्। सिन्ह्वा समाचार संस्थासँग टेलिफोनमा कुरा गर्दै उनले सो कुरा बताएका हुन्।
एक सैनिक स्रोतका अनुसार सुडानी सशस्त्र बलले पनि सोही क्षेत्रमा र्यापिड सपोर्ट फोर्सेस र उसको सहयोगी सुडान पिपुल्स लिबरेसन मुभमेन्ट–नर्थका विभिन्न ठाउँमा हवाई कारबाही बढाएको छ।
कुर्मुक क्षेत्रमा पछिल्ला केही महिनायता गाउँबस्तीमा ड्रोन आक्रमण बढ्दै गएको छ। यसले सर्वसाधारणको ज्यान जाने क्रम बढाएको छ भने ठूलो संख्यामा मानिसहरू घर छाडेर दमाजिनतर्फ भाग्न बाध्य भएका छन्।
सुडानमा सन् २०२३ अप्रिलको मध्यदेखि सरकारी सेना र अर्धसैनिक समूहबीच सशस्त्र लडाइँ जारी छ। द्वन्द्वका कारण हालसम्म दशौँ हजार मानिस मारिएका छन् भने लाखौँ नागरिक देशभित्रै विस्थापित भएका छन् र कैयौँ देशबाहिर शरणार्थी भएका छन्।
