झापा — नेपाली कांग्रेसका नेता डा. सुनील शर्माले पार्टीभित्र देखिएको मतभेद अन्त्य गरेर एकताबद्ध भएर अघि बढ्न नेतृत्वलाई आग्रह गरेका छन्। मंगलबार झापा पुगेका शर्माले पार्टीलाई एकढिक्का बनाउने मुख्य जिम्मेवारी सभापति गगन थापा र वरिष्ठ उपसभापति विश्वप्रकाश शर्माको भएको बताए।
उनका अनुसार पार्टीभित्रका असमझदारीलाई लम्ब्याउनुको सट्टा संवाद र सहमतिबाट समाधान खोज्नुपर्छ। विचार र दृष्टिकोणमा फरक हुनु स्वाभाविक भए पनि त्यसलाई आपसी विवादको विषय बनाउन नहुने उनको भनाइ छ।
कांग्रेसलाई बलियो र जनतामाझ विश्वासिलो बनाउन सबै नेता तथा कार्यकर्ता एक ठाउँमा उभिनुपर्ने र व्यक्तिगत आग्रह–पूर्वाग्रहभन्दा पार्टीको हितलाई माथि राख्नुपर्ने सन्देश उनले दिएका छन्।
कांग्रेसभित्र विशेष महाधिवेशनको विषयलाई लिएर लामो समयदेखि मतभेद देखिँदै आएको छ। नेतृत्व परिवर्तन, महाधिवेशनको वैधानिकता र पार्टी सञ्चालनका विषयमा उठेका प्रश्नले पार्टी विभाजन हुन सक्ने आशङ्कासमेत बढाएको छ।
डा. शर्माले यसअघि पनि कांग्रेस विभाजनको बाटोमा जान नहुने धारणा राख्दै आएका छन्। दुवै पक्षका नेताले अहङ्कार त्यागेर असन्तुष्ट पक्षलाई समेत समेटेर अघि बढ्नु नेतृत्वको दायित्व भएको उनको भनाइ छ।
