बंगालको खाडीमा बनेको चक्रवात अर्नबको प्रभाव नेपालको हिमाली क्षेत्रमा पनि पर्ने देखिएको छ। जल तथा मौसम विज्ञान विभागले उच्च पहाडी तथा हिमाली भूभागमा भारी हिमपात, हिमआँधी र हिमपहिरोको जोखिम रहेको भन्दै सतर्क रहन आग्रह गरेको छ।
यही जोखिमलाई ध्यानमा राख्दै जिल्ला प्रशासन कार्यालय डोल्पाले उपल्लो डोल्पाका पर्यटकीय क्षेत्रमा रहेका पर्यटकलाई सतर्कता अपनाउन अनुरोध गरेको छ। प्रशासनका अनुसार उपल्लो डोल्पामा अहिले २४४ जना पर्यटक रहेका छन्। तीमध्ये १४९ जना नेपाली नागरिक छन् भने ४४ जना सार्क मुलुकका र ५१ जना अन्य मुलुकका नागरिक छन्।
प्रशासनले पर्यटक तथा हिमाली क्षेत्रका बासिन्दालाई जोखिमयुक्त क्षेत्रमा नजान आग्रह गरेको छ। जोखिमयुक्त ठाउँमा पुगिसकेकाहरूलाई सुरक्षित स्थानमा रहन अनुरोध गरिएको छ। मौसम प्रतिकूल भएका बेला जोखिमपूर्ण यात्रा नगर्न पनि प्रशासनले भनेको छ।
उक्त अवधिमा निषेधित क्षेत्रमा जाने पदयात्राका लागि नयाँ अनुमति जारी नगर्ने प्रशासनले जनाएको छ। ट्रेकिङ एजेन्सी, पदयात्री र गाइडलगायत सबै सरोकारवालालाई सूचनाको पालना गर्न र गराउन आग्रह गरिएको छ।
प्रमुख जिल्ला अधिकारी जुनु हमालले सम्भावित विपद्बाट हुन सक्ने जनधनको क्षति कम गर्न सबै सरोकारवालाले जिम्मेवार भूमिका खेल्नुपर्ने बताएकी छन्। पर्यटकीय क्षेत्रमा रहेका नेपाली तथा विदेशी नागरिकको सुरक्षा सुनिश्चित गर्न प्रशासनले आग्रह गरेको छ।
