नेपाल प्रिमियर लिग (एनपिएल) को तेस्रो संस्करणका लागि कर्णाली याक्सले ठूलो भर्ती गरेको छ। टोलीले पाकिस्तानका अलराउन्डर हुसेन तलतलाई विदेशी खेलाडीका रूपमा अनुबन्ध गरेको हो।
कर्णालीले बिहीबार सामाजिक सञ्जालमार्फत ३० वर्षीय तलत आधिकारिक रूपमा टोलीका सदस्य बनेको घोषणा गरेको छ। तलतले पाकिस्तानको राष्ट्रिय टोलीबाट एकदिवसीय अन्तरराष्ट्रिय र टी–२० अन्तरराष्ट्रिय क्रिकेट खेलिसकेका छन्। उनले १२ एकदिवसीय खेलमा २२४ रन र २३ टी–२० अन्तरराष्ट्रिय खेलमा ४४१ रन जोडेका छन्। टी–२० अन्तरराष्ट्रियमा उनको नाममा सात विकेट पनि छ।
टी–२० क्रिकेटमा अनुभवी मानिने तलतले अहिलेसम्म २०४ खेलबाट तीन हजार ९५० रन बनाएका छन्। घरेलु क्रिकेटका साथै विभिन्न फ्रेन्चाइज प्रतियोगितामा नियमित खेल्दै आएका उनले पाकिस्तान सुपर लिग (पिएसएल) र बङ्लादेश प्रिमियर लिग (बिपिएल) जस्ता प्रतिष्ठित व्यावसायिक लिगमा समेत खेलिसकेका छन्।
अब उनी नेपाल प्रिमियर लिगमा पनि देखिने भएका छन्। एनपिएलको तेस्रो संस्करण यही कात्तिक ९ गतेदेखि काठमाडौँमा आयोजना हुँदैछ। तलतको आगमनले कर्णालीको ब्याटिङ र बलिङ दुवैलाई मजबुत बनाउने अपेक्षा गरिएको छ।
